جہانگیر ترین گروپ نے اپوزیشن کے پنجاب کی وزارتِ اعلیٰ کے امیدوار حمزہ شہباز کی باضابطہ حمایت کر دی جس کے بعد حمزہ شہباز کا کا پلڑہ بھاری ہو گیا ہے۔

پنجاب اسمبلی کے اجلاس سے قبل حمزہ شہباز کے ہمراہ پریس کانفرنس کرتے ہوئے جہانگیر ترین گروپ کے رہنما نعمان لنگڑیال نے وزارت اعلیٰ کے لیے متحدہ اپوزیشن کے امیدوار حمزہ شہباز کی حمایت کا اعلان کیا۔

اس حوالے سے رکن سعید اکبر نوانی  کا کہنا ہے کہ ترین گروپ میں کسی بھی معاملے پر کوئی اختلافات نہیں ہیں۔ انہوں نے واضح کیا ہے کہ ہم جہانگیر ترین کی قیادت میں متحد کھڑے ہیں اور ہمارا متفقہ فیصلہ ہے کہ ترین گروپ صرف نون لیگ کو ووٹ دیگا ۔جہانگیر ترین گروپ کی حمایت سے متحدہ اپوزیشن کے 188 ارکان بنتے ہیں، جبکہ وزیرِ اعلیٰ پنجاب بننے کے لیے 186 ارکان کی ضرورت ہوتی ہے۔

ذرائع نے بتایا ہے کہ ن لیگ کے 165، پیپلز پارٹی کے 7، 2 آزاد ارکان اور 14 ترین گروپ کے ملا کر مجموعی تعداد 188 ہو گئی ہے۔دوسری جانب چھینہ گروپ سمیت پی ٹی آئی کے 169 اور ق لیگ کے 10 ملا کر کل تعداد 179 ہے۔