پاکستان تحریک انصاف کے کارکنو ں نے لاہور کے گلبرگ ہوٹل کے باہر شدید احتجاج کیا، اور ہوٹل میں موجود اپوزیشن اور پارٹی کے منحرف اراکین کے خلاف شدید نعرے بازی کی۔ پی ٹی آئی کارکنوں نے رکاوٹیں ہٹاکر ہوٹل میں گھسنے کی کوشش کی لیکن پولیس نے اسے ناکام بنادیا۔
واضح رہے کہ متحدہ اپوزیشن کے اراکین پنجاب اسمبلی اور پی ٹی آئی کے منحرف اراکین گلبرگ کےاسی نجی ہوٹل میں قیام پذیر ہیں۔ علاوہ ازیں اپوزیشن کا مشترکہ اجلاس بھی آج اسی ہوٹل میں ہوگا اور عبدالعلیم خان بھی اسی ہوٹل میں موجود ہیں۔ اجلاس کی صدارت حمزہ شہباز کرینگے، اور اراکین کے اعزاز میں افطار ڈنر بھی دیا جائے گا۔
آج تحریک انصاف کے کارکن ریلی کی شکل میں ہوٹل کے باہر پہنچے، احتجاج کیا اورہوٹل کے باہر شدید نعرے بازی کی۔ پی ٹی آئی کارکنوں نے ہوٹل میں گھسنے کیلئے بیرئیر ہٹانے کی کوشش کی، جسے پولیس نے ناکام بنا دیا۔ ابھی بھی مین بلیوارڈ پر واقع ہوٹل کے باہر پولیس کی بھاری نفری تعینات ہے۔
پولیس کے مطابق ایک موقع پر صورتحال کافی کشیدہ ہوگئی اور تصادم کا خطرہ پیدا ہوگیا تھا، جب لیگی اراکین اسمبلی نے تحریک انصاف کے کارکنوں کی جانب اشتعال انگیز انداز میں بڑھنے کی کوشش کی۔ جواباً تحریک انصاف کے کارکن بھی سڑک پار کر کے نعرے بازی کرتے ہوئے آگے آ گئے۔ پولیس نے بروقت ایکشن لیتے ہوئے حالات کنٹرول میں کئے، اور آہنی رکاوٹیں کھڑی کرکے تحریک انصاف کے کارکنوں کو پیچھے کردیا۔ لیگی اراکین پنجاب اسمبلی نے پولیس سے تحریک انصاف کا مظاہرہ ختم کروانے کا مطالبہ کیا ہے۔
