وزیراعظم عمران خان نے کہا ہے کہ اتحادی حکومت میں ہمیشہ بلیک میل ہونا پڑتا ہے، اس بار ہم اپنے لوگوں کی اکثریت کے ساتھ حکومت بنائیں گے۔

اسلام آباد میں وزیراعظم عمران خان و چیئرمین پاکستان تحریک انصاف کی زیر صدارت پارٹی کے مرکزی پارلیمانی بورڈ کا اجلاس ہوا، جس میں پارلیمانی بورڈ تشکیل دینے کی منظوری دی گئی۔ پارلیمانی بورڈ ٹکٹوں سے متعلق پالیسی تشکیل دے گا، وزیراعظم عمران خان نے الیکشن کی تیاریاں تیز کرنے کی ہدایت کردی۔

وزیراعظم نے کہا کہ امیدواروں اور ٹکٹوں کی تقسیم سے متعلق پالیسی کو جلد حتمی شکل دی جائے، انہوں نے کہا کہ ٹکٹوں کیلئے پارٹی کے پرانے ورکرز کو ترجیح دیں گے۔

عمران خان کا کہنا تھا کہ مفاد پرست اور ضمیر فروشوں کیلئے پارٹی میں کوئی جگہ نہیں، اب مخلص اور قربانیاں دینے والے کارکنوں کو آگے لایا جائے گا۔ انہوں نے کہا کہ اتحادی حکومت میں ہمیشہ بلیک میل ہونا پڑتا ہے اس لیے اس بار ہم اپنے لوگوں کی اکثریت کے ساتھ حکومت بنائیں گے۔