واٹس ایپ کی جانب سے صارفین کیلئے نیا بہترین فیچر متعارف کرائے جانے کا امکان ہے۔

میٹا کی زیرملکیت میسجنگ ایپ کی اپ ڈیٹس پر نظر رکھنے والی سائٹ WaBetaInfo کے مطابق واٹس ایپ میں بڑے گروپس کی چیٹ کو آٹو میوٹ کرنے کے فیچر پر کام کیا جارہا ہے۔

نئے فیچر سے پہلے واٹس ایپ کی جانب سے اعلان کیا گیا تھا کہ اب ایک گروپ میں 1024 اراکین کو شامل کیا جاسکے گا۔اب یہ بات تو سبھی جانتے ہیں کہ اگر ایک گروپ میں 1024 اراکین ہوں گے تو اسی حساب سے میسجز بھی ہوں گے اور ان کے نوٹیفکیشن بھی موصول ہوں گے۔

نوٹیفکیشنز کی یہ بھرمار ہر کسی کو پسند نہیں ہوتی، اسی لیے واٹس ایپ نے اپنے صارفین کی ناپسندیدگی کو مدد نظر رکھتے ہوئے اس نئے فیچر کو بیٹا ورژن میں کچھ صارفین کے لیے متعارف کرایا ہے۔اس فیچر کے تحت 256 سے زیادہ افراد والے گروپ خودکار طور پر میوٹ ہوجائیں گے، یعنی میسجز تو آتے رہیں گے مگر اسمارٹ فون پر نوٹیفکیشن موصول نہیں ہوں گے۔

اس فیچر کی ایک خاصیت یہ بھی ہے کہ یہ نیا فیچر خودکار طور پر کام کرے گا تو صارف کو خود کچھ کرنے کی ضرورت نہیں ہوگی۔