ملک میں یوٹیلیٹی اسٹورز پر چینی، آٹے اور گھی کی قیمتوں میں اضافہ کردیا گیا، تاہم بے نظیر انکم سپورٹ پروگرام کے مستحقین قیمتوں میں اضافے سے مستثنیٰ ہوں گے۔

یوٹیلیٹی اسٹورز پر آج سے چینی کی قیمت میں 19 روپے فی کلو کا اضافہ کردیا گیا ہے جبکہ گھی کی فی کلو قیمت میں 75 روپے کا اضافہ کردیا گیا ہے۔

یوٹیلٹی اسٹورز پر آٹے کے 20 کلو کا تھیلا 496 روپے مہنگا ہوگیا ہے اور چینی کی قیمت اب 70 روپے سے بڑھ کر 89 روپے فی کلو ہوگئی ہے۔

گھی کی فی کلو قیمت 300 روپے سے بڑھ کر 375 روپے اور آٹے کا 20 کلو کا تھیلا 800 روپے سے بڑھ کر 1296 روپے کا ہوگیا ہے۔

ترجمان یوٹیلیٹی اسٹورز کے مطابق بے نظیر انکم سپورٹ پروگرام (بی آئی ایس پی) کے مستحقین قیمتوں میں اضافے سے مستثنیٰ ہوں گے جن کے لیے چینی فی کلو 70 روپے، گھی کی قیمت 300 روپے فی کلو ہوگی۔

ترجمان نے کہا کہ بی آئی ایس پی مستحقین کو آٹے کے 10 کلو کا تھیلا 400 روپے اور دیگر شہریوں کو 648 روپے میں دیا جائے گا۔

یوٹیلیٹی اسٹورز پر وزیراعظم پیکج کے تحت آج سے ماہانہ خریداری کی حد میں بھی کمی کردی گئی ہے جس کے بعد چینی اور گھی کی ماہانہ خریداری کی حد 5 سے کم کرکے 3 کلو مقرر کردی گئی ہے جبکہ آٹے کی ماہانہ خریداری کی حد 40 سےکم کرکے 20 کلو مقرر کردی گئی ہے۔