چیئرمین پی ٹی آئی عمران خان کی صدارت میں پارٹی رہنماؤں کا مشاورتی اجلاس ہوا جس میں نگران وزیر اعلیٰ کی تقرری کے خلاف بھرپور احتجاج کرنے کا فیصلہ کیا گیا۔
اجلاس میں تحریک انصاف کی جانب سے فیصلہ کیا گیا کہ کل الیکشن کمیشن پنجاب کے دفتر کے باہر احتجاج اور نگران وزیر اعلیٰ کے تقرر کو عدالت میں چیلنج کیا جائے گا، اس حوالے سے کل ہی عدالت میں پٹیشن بھی دائر کی جائے گی۔
عمران خان نے کہا کہ ان کو معلوم ہے کہ یہ الیکشن میں ہمیں ہرا نہیں سکتے، اس لیے الیکشن نہیں کراتے، ہمارے مخالف لوگوں کا اب ایک پوائنٹ ایجنڈا ہوگا پی ٹی آئی کو کیسے دبانا ہے، یہ تب الیکشن کرائیں جب انتظامیہ اور عملہ ان کا اپنا ہوگا۔
سابق وزیراعظم نے کہا کہ جنرل باجوہ کے این آر او ٹو ملنے سے یہ سب بچ گئے، توشہ خانہ کا کیس سب سے بڑا مزاق تھا، اس حکومت نے توشہ خانہ میں میری تمام تفصیل دی، اب عدالت نے ان سے توشہ خانہ کا ریکارڈ طلب کیا تو کہتے ہیں کہ سیکرٹ ہے۔

انہوں نے کہا کہ نواز شریف اور آصف علی زرداری نے توشہ خانہ سے گاڑیاں چوری کیں، صاف شفاف الیکشن نہ ہوئے تو ملک ہاتھ سے نکل جائے گا۔