عالمی سطح پر امن اور سکیورٹی کو یقینی بنانے والے ادارے اقوام متحدہ کے دو نمائندوں نے تیل کی تین عالمی کمپنیوں سے مطالبہ کیا ہے کہ غزہ جنگ کے دوران اسرائیلی فوج کو تیل سپلائی بندکر دیں۔
غیر ملکی خبر رساں ادارے کی رپورٹ کے مطابق خوراک کےحق سے متعلق اقوام متحدہ کےخصوصی نمائندے مائیکل فخری نے ریسرچ بھی پیش کی ہے۔
مائیکل فخری کے مطابق امریکا، برازیل، روس، آذربائیجان اور قازقستان کے ذریعےاسرائیلی فوج کو تیل دیا جا رہا ہے، اسرائیلی فوج کو تیل سپلائی کرنا غزہ میں نسل کشی میں ملوث ہونے جیسا ہی ہے۔
نمائندہ اقوام متحدہ مائیکل فخری نے کہا کہ اسرائیلی فوج کو تیل دینے والی کمپنیوں پر معاشی پابندیاں لگنی چاہئیں۔
مناسب رہائش کےحق سے متعلق خصوصی نمائندہ یو این بالاکرشنن راجا گوپال نے 3 تیل کمپنیوں کو تنبیہہ کرتے ہوئے کہا کہ ان 3 تیل کمپنیوں کو یہ کام روک دینا چاہیے یا نتائج کے لیے تیار رہنا چاہیے۔
واضح رہے کہ غزہ میں 5 ماہ سے جاری جنگ کے باعث تقریباً 23 لاکھ فلسطینیوں نے رفح کے کیمپوں میں پناہ لے رکھی ہے۔