کویت کی پارلیمنٹ کے ایک رکن شعیب المعظری نےبھارتی فورسز کی مسلمانوں پر مظالم کی مذمت کی اور اپنے ایک بیان میں بھارتی اشیاء کے بائیکاٹ کا مطالبہ کیا ہے۔

آسام میں تجاوزات کے خلاف نام نہاد آپریشن کے دوران مسلمانوں پر تشدد کے بعد ان کی لاش کی بے حرمتی کے واقعے کے خلاف مشرق وسطیٰ میں بھارتی مصنوعات کے بائیکاٹ کی مہم چلائی جارہی ہے، مہم کے دوران عمان کے مفتی اعظم شیخ الخیلی نے لوگوں کو بھارتی مصنوعات نہ خریدنے کی تلقین کرتے ہوئے بین الاقوامی برادری سے بھی مداخلت کرنے کی اپیل کی ہے۔

عرب ریاستوں کے علاوہ دیگر مسلم ممالک میں بھی بائیکاٹ انڈیا کی مہم زور پکڑ رہی ہیں اور بھارت کی جانب سے انسانی حقوق کی خلاف ورزیوں کے خلاف احتجاج کیا جا رہا ہے۔

یاد رہے کہ کچھ روز قبل آسام میں تجاوزات کے خلاف آپریشن کے دوران  بھارتی پولیس کی فائرنگ سے 2 مسلمان شہید اور درجنوں  زخمی ہو ئے تھے  اورواقعے کی کوریج کرنے والے فوٹو گرافر نے لاش کی بے حرمتی کی تھی جس کی ویڈیو سوشل میڈیا پر وائرل ہوئی تھی اور عوام کا شدید ردعمل سامنے آیا تھا۔