بنگلہ دیش کی وزیراعظم شیخ حسینہ نے اپنے ایک بیان میں کہا ہے کہ بھارت میں مذہبی منافرت کے واقعات کا پڑوسی ممالک پر اثر ہوتا ہے جس کے ردعمل میں بنگلہ دیش میں رہنے والے ہندوؤں کو بھی حملوں کا سامنا کرنا پڑ سکتا ہے، بھارتی حکومت ان حقائق سے آگاہ رہے۔

انہوں نے بھارت پر واضح کیا کہ نئی دہلی شرپسندوں کے ساتھ سختی سے نمٹے لیکن بھارت میں ایسا کچھ نہیں ہونا چاہیے جو ہمارے ملک کے حالات کو متاثر کرے اور جس کی وجہ سے بنگلہ دیش میں مقیم ہندوؤں کو مشکلات کا سامنا کرنا پڑے۔

بھارت میں حکومتی سرپرستی میں ہونے والی مذہبی تقسیم پر گفتگو کرتے ہوئے ان کا کہنا تھا کہ بھارت یقینی بنائے کہ مذہب کی بنیاد پر لوگوں کو تقسیم نہ کیا جائے۔

مزید ان کا کہنا تھا کہ بنگلہ دیش میں رہنے والے ہندو خود کو اقلیت نہ سمجھیں، وہ اپنی مذہبی رسومات کا آزادی سے اہتمام کریں، کیونکہ ہمارا ماننا ہے کہ جو جس مٹی سے پیدا ہوا ہے، جہاں اس نے پرورش پائی ہے اس نے وہیں رہنا ہے، جس کی اسے مکمل آزادی ہونی چاہیے۔