یورپی یونین کے وزیر خارجہ جوزف بوریل نے برسلز میں ایرانی حکام سے ملاقات کیلئے اپنی آمادگی کا اظہار کرتے ہوئے تہران سے مطالبہ کیا ہے کہ وہ وقت ضائع نہ کرے اور اپنے جوہری پروگرام پر مذاکرات کی میز پر جلد واپس آئے۔ انہوں نے کہا کہ ایرانی حکام کے ساتھ ملاقات کیلئے تیار ہیں لیکن اس کا وقت گزرتا جا رہا ہے، تہران تاخیر نہ کرے۔ بوریل نے واشنگٹن میں میڈیا نمائندوں کے ساتھ گفتگو میں کہا  کہ میں جانتا ہوں کہ ایرانی کسی نہ کسی طرح بطور کوآرڈینیٹر مجھ سے اور 2015ء میں طے پائے جوہری معاہدے کی کونسل کے ارکان سے گفتگو کرنا چاہتے ہیں۔ یورپی یونین کے عہدیدار کا کہنا تھا کہ میں ایرانیوں سے ملنے کو تیار ہوں مگر معاہدے کو بچانے کیلئے وقت بہت کم رہ گیا ہے۔انہوں نے کہا کہ میں کوئی مخصوص تاریخ نہیں دے سکتا، البتہ اس پر بات کی جا سکتی ہے۔ جوزف بوریل نے بتایا کہ انہوں نے جمعرات کو امریکی وزیر خارجہ  انٹونی بلنکن  کے ساتھ واشنگٹن میں بات چیت کی جس میں ایران کے جوہری پروگرام پر جاری مذاکرات کا معاملہ بھی زیر بحث آیا۔انہوں نے مزید کہا کہ میں یہ نہیں کہہ رہا کہ یہ بہت ضروری ہے لیکن مجھے اس سلسلے میں ایک طرح کے اسٹریٹجک صبر کا مظاہرہ کرنا ہوگا کیونکہ ہم اپنے آپ کو ناکام نہیں ہونے دے سکتے۔