وزیراعظم عمران خان نے گزشتہ روز کراچی میں ایم کیو ایم کی ریلی پر پولیس کے تشدد کا نوٹس لے کر ذمہ داروں کے خلاف کاروائی کا عندیہ دیا ہے۔
ٹوئٹر پر جاری اپنے بیان میں وزیراعظم عمران خا ن کا کہنا تھا کہ میں نے سندھ کے بلدیاتی قانون کے خلاف متحدہ قومی موومنٹ کے پرامن احتجاج پر سندھ پولیس کے تشدد کا نوٹس لیا ہے اور وزارت داخلہ، چیف سیکرٹری اور آئی جی سندھ سے رپورٹس طلب کی ہیں چنانچہ ان رپورٹس کے ملنے کے بعد ذمہ داروں کے خلاف ضروری کارروائی کروں گا۔
یاد رہے کہ گزشتہ روز ایم کیو ایم نے بلدیاتی قانون کے خلاف وزیراعلیٰ ہاؤس کے باہر دھرنا دیا۔ پولیس نے شرکاء کو منتشر کرنے کیلئے ریلی پر شیلنگ اور لاٹھی چارج کیا جس سے ایم کیو ایم رہنماؤں سمیت کئی کارکن زخمی ہوگئے، پولیس نے 2 خواتین سمیت متعدد کارکنوں کو حراست میں بھی لے لیا۔
دوسری جانب ایم کیو ایم پاکستان نے دعویٰ کیا ہے کہ پولیس تشدد کی وجہ سے سابق ٹاؤن ناظم حنیف سورتی کی آنکھ ضائع ہوگئی ۔ ایک کارکن اسلم کی شہادت ہوئی اور رکن اسمبلی صداقت حسین انتہائی نگہداشت وارڈ میں زیر علاج ہیں۔
