سجل علی نے احد رضا میر سے علیحدگی کی خبروں پر خاموشی توڑتے ہوئے بتا دیا ہے کہ ان کے شوہر احد رضا آج کل ان کے ساتھ کیوں نظر نہیں آ رہے۔
حال ہی میں سجل علی کی بہن صبور علی کی شادی اور سجل کی فلم کھیل کھیل میں کے پریمیئر میں احد رضا میر کی غیر موجودگی نے اس جوڑی میں علیحدگی کی خبروں کو ہوا دی تھی۔ علاوہ ازیں دیگر محفلوں میں بھی سجل علی کی شوہر کے بغیر شرکت پر سوشل میڈیا پر یہ خبریں گرم ہو گئیں کہ شاید ان کی علیحدگی ہوگئی ہے۔
تاہم اب سجل علی کی ایک ویڈیو سوشل میڈیا پر وائرل ہوئی ہے جس میں وہ اس بات کی وضاحت دے رہی ہیں کہ آج کل وہ اور احد ایک ساتھ نظر کیوں نہیں آتے۔
ویڈیو میں دیکھا جاسکتا ہے کہ جب سجل سے سوال کیا گیا کہ لوگ یہ پوچھتے ہیں کہ آج کل احد آپ کے ساتھ کیوں نظر نہیں آ رہے؟ جواباً سجل علی کہتی ہیں کہ احد رضا ان دنوں پاکستان میں نہیں ہیں، وہ کام میں مصروف ہیں۔ اسی لئے وہ میرے ساتھ نہیں ہیں۔
یاد رہے کہ اس سے قبل سجل علی کی مینیجر نے بھی سجل علی کی علیحدگی سے متعلق خبروں پر برہمی کا اظہار کرتے ہوئے کہا تھا کہ ریٹنگز کیلئے کسی کی ذاتی زندگی کے متعلق خبریں شائع کرنا شرمناک صحافت ہے۔
