لاہور کی ضلع کچہری عدالت نے اداکارہ میشا شفیع کے قابل ضمانت وارنٹ گرفتاری جاری کر دئیے ہیں۔

تفصیلات کے مطابق علی ظفر کے خلاف سوشل میڈیا پر مہم چلانے کے خلاف ایف آئی اے میں دائر کئے گئے مقدمے میں جوڈیشل مجسٹریٹ غلام مرتضیٰ ورک نے میشا شفیع اور شریک ملزمہ ماہم جاوید کے قابل ضمانت وارنٹ گرفتاری جاری کر دئیے ہیں۔

واضح رہے کہ ایف آئی اے نے علی ظفر کی مدعیت میں میشا شفیع سمیت 8 ملزمان کے خلاف چالان پیش کررکھا ہے۔ ایف آئی اے نے چالان میں کہا ہے کہ میشا شفیع سمیت دیگر ملزمان نے علی ظفر کے خلاف سوشل میڈیا پر جنسی ہراسانی کی مہم چلائی  لیکن ملزمان اب تک  اپنی صفائی میں ٹھوس شواہد پیش نہیں کرسکے۔

عدالت نے واضح کیا ہے کہ آئندہ سماعت پر اگر علی ظفر کے وکیل نے زیر التواء درخواستوں پر دلائل نہ دئیے تو پراسکیوٹر کے دلائل کی روشنی میں فیصلہ کر دیا جائے گا۔