لاہور ہائیکورٹ نے اداکارہ میرا کی جانب سے کیس کی عدم پیروی پر تکذیب نکاح کی درخواست خارج کردی ہے۔

تفصیلات کے مطابق اداکارہ میرا نے رواں برس فروری میں خود کو عتیق الرحمٰن نامی شخص کی بیوی قرار دئیے جانے کے لاہور کی سیشن کورٹ کے فیصلے کے خلاف لاہور ہائیکورٹ میں درخواست دائر کی تھی، لیکن اداکارہ میرا اور اس کے وکیل نے کیس کی پیروی نہیں کی، جس پر عدالت نے ان کا کیس خارج کردیا۔

لاہور ہائیکورٹ کے جسٹس انوار الحسن نے اداکارہ میرا کی درخواست پر سماعت کی اور معزز جج نے اداکارہ اور ان کے وکیل کو پیش ہونے کا حکم دیا، لیکن بار بار حکم جاری کرنے کے باوجود اداکارہ اور اس کے وکیل پیش نہ ہوئے، جس کے بعد عدالت نے کیس کی عدم پیروی کرنے پر میرا کا کیس خارج کردیا۔

یاد رہے کہ لاہور کی سیشن کورٹ نے 31 جنوری کو میرا کی ہی درخواست کو مسترد کرتے ہوئے قرار دیا تھا کہ وہ عتیق الرحمٰن کی بیوی ہیں۔

سیشن کورٹ سے قبل فیملی کورٹ نے بھی 2018ء میں اداکارہ میرا کو عتیق الرحمٰن کی بیوی قرار دیا تھا، جس کے خلاف اداکارہ نے اپیل دائر کی تھی، مگر عدالت نے ان کی درخواست مسترد کرتے ہوئے عتیق الرحمٰن کے حق میں فیصلہ دیا تھا۔