سعودی عرب رواں برس قطر میں ہونے والے فیفا ورلڈکپ کے ٹکٹ ہولڈرز کیلئے ویزا کی منظوری دے گا۔

خلیجی میڈیا کے مطابق سعودی وزارت خارجہ نے قطر میں ہونے والے فٹ بال ورلڈکپ کے ٹکٹ ہولڈرز کیلئے  ویزے کی منظوری کی تصدیق کر دی ہے۔

سعودی میڈیا کے مطابق حیا فین آئی ڈی کے حامل تماشائیوں کو ٹورنامنٹ کے آغاز سے 10 دن پہلے مملکت میں داخل ہونے کی اجازت دیتے ہوئے ویزا دیا جائے گا اور انہیں 60 دن تک مملکت میں رہنے کی اجازت بھی دی جائے گی۔

سعودی وزارت خارجہ نے کہا ہے کہ ویزا ہولڈرز کو اس مدت کے دوران ملک سے باہر جانے اور دوبارہ داخل ہونے کی اجازت بھی ہوگی، البتہ ویزے کیلئے درخواست دینے والے کسی بھی شخص کو سعودی عرب جانے سے پہلے میڈیکل انشورنس بھی حاصل کرنی ہوگی۔

میڈیا رپورٹس کے مطابق فیفا فٹ بال ٹورنامنٹ کیلئے اس ماہ 2.45 ملین ٹکٹس فروخت ہوچکی ہیں۔

واضح رہے کہ فیفا ورلڈ کپ قطر میں 20 نومبر سے شروع ہو گا۔