سہ ملکی ٹی ٹوئنٹی سیریز کے اہم میچ میں میزبان نیوزی لینڈ نے بنگلہ دیش کو 48 رنز سے شکست دی ۔
کرائسٹ چرچ میں کھیلے گئے میچ میں بنگلا دیش نے نیوزی لینڈ کے خلاف ٹاس جیت کر فیلڈنگ کرنے کا فیصلہ کیا تھا اور نیوزی لینڈ کو بیٹنگ کی دعوت دی تھی۔
نیوزی لینڈ نے پہلے بیٹنگ کرتے ہوئے مقرر 20 اوورز میں ڈیون کانوے کے 64 رنز اور گلین فلپس کے جارحانہ 60 رنز کی بدولت بنگلا دیش کو جیت کے لیے 209 رنز کا ہدف دیا تھا۔ڈیون کانوے نے 40 گیندوں پر 64 رنز کی اننگز کھیلی جبکہ گلین فلپس نے 24 گیندوں پر 5 چھکوں کی مدد سے 60 رنز کی جارحانہ اننگز کھیلی، ان کے علاوہ مارٹن گپٹل نے بھی 34 اور فن ایلن نے 32 رنز بنائے۔
بنگلا دیش کی جانب سے محمد سیف الدین اور عبادت حسین نے دو، دو جبکہ شریف الاسلام نے ایک وکٹ حاصل کی۔
ہدف کے تعاقب میں بنگلا دیش کی ٹیم انتہائی کوشش کے باوجود بھی مقررہ اوورز میں 7 وکٹوں کے نقصان پر 160 رنز بنا سکی۔بنگلا دیش کی جانب سے کپتان شکیب الحسن کے علاوہ کوئی بھی بلے باز قابل ذکر کارکردگی کا مظاہرہ نہیں کرسکا، مایہ ناز آل راؤنڈر نے 44 گیندوں پر 70 رنز کی اننگز کھیلی جبکہ لٹن داس اور سومیا سرکار نے 23، 23 رنز بنائے۔
نیوزی لینڈ کی جانب سے ایڈم ملنے نے تین جبکہ ٹم ساؤتھی بھی دو وکٹیں لیں۔پاکستان کے خلاف مین آف دی میچ مائیکل بریسویل نے بھی دو وکٹیں لیں ۔
New Zealand continue to build momentum towards the #T20WorldCup 💪#NZvBAN | 📝 Scorecard: https://t.co/aqJCmjJ2gL pic.twitter.com/hqxl9AEQZF
— ICC (@ICC) October 12, 2022
میچ میں جارحانہ بیٹنگ کرتے ہوئے صرف 24 گیندوں پر 60 رنز بنانے والے کیوی پلیئرگلین فلپس کو پلیئر آف دی میچ کا اعزاز دیا گیا۔
Devon Conway continues his good form with another big innings 👏#NZvBAN | 📝 Scorecard: https://t.co/aqJCmjJ2gL pic.twitter.com/smSjxMcTQz
— ICC (@ICC) October 12, 2022
خیال رہے کہ آج کا میچ اس لیے بھی اہمیت کا حامل تھا کہ بنگلہ دیش کی ٹیم یہ میچ ہار کر سہ فریقی ٹورنامنٹ کے فائنل کی دوڑ سے باہر ہو گئی ہے، اب تین ملکی سیریز کا فائنل جمعہ 14 اکتوبر کو مہمان نیوزی لینڈ اور پاکستان کرکٹ ٹیموں کے درمیان کھیلا جائے گا۔
واضح رہے کہ سہ فریقی سیریز میں بنگلہ دیش اور نیوزی لینڈ کے علاوہ پاکستان بھی شامل ہے جسے گزشتہ روز میزبان ٹیم نے یکطرفہ مقابلے میں شکست دی تھی۔
سیریز کا آخری راؤنڈ میچ کل پاکستان اور بنگلہ دیش کے درمیان کھیلا جائے گا۔
