شاہ محمود قریشی نے کہا ہے کہ ہمارا احتجاج پرامن اور ہمارا نصب العین حقیقی آزادی کا حصول ہے۔

تفصیلات کے مطابق سابق وزیر خارجہ شاہ محمود قریشی نے سماجی رابطے کی ویب سائٹ ٹویٹر پر اپنے ایک پیغام میں کہا کہ جمعہ 28 اکتوبر کو پاکستان کی تاریخ کا سب سے بڑا انسانی قافلہ چیئرمین عمران خان کی قیادت میں لاہور سے اسلام آباد کے لئے روانہ ہوگا۔

سابق وزیر خارجہ شاہ محمود قریشی نے مزید کہا کہ ہمارا احتجاج پرامن اور ہمارا نصب العین حقیقی آزادی کا حصول ہے، ہر محبِ وطن پاکستانی اس مارچ کا حصہ بنے کیونکہ یہ اس ملک کے مستقبل کا سوال ہے۔
واضح رہے کہ اس سے قبل لاہور میں پارٹی کے دیگر رہنماؤں کے ہمراہ پریس کانفرنس کرتے ہوئے چیئرمین پی ٹی آئی عمران خان نے جمعہ سے لانگ مارچ کا اعلان کیا اور کہا کہ لانگ مارچ کا آغاز لاہور سے ہوگا، لانگ مارچ کا آغاز لاہور کے لبرٹی چوک سے ہوگا۔

سابق وزیراعظم نے کہا کہ آج ہمیں کہا جارہا ہے ملک مشکل میں ہے اس لیے احتجاج نہ کریں، مگر ملک کے حالات اور صورت حال ایسی ہے کہ اب عوام کا مطالبہ یہی ہے کہ امپورٹڈ حکومت کے خلاف نکلا جائے۔