وفاقی وزیر اطلاعات مریم اورنگزیب کا کہنا ہےکہ تسنیم حیدر پاکستان مسلم لیگ ن لندن کا ترجمان نہیں ہے اور نہ ہی اس کا ن لیگ سے کوئی تعلق ہے۔
ایک بیان میں مریم اورنگزیب کا کہنا تھا کہ تسنیم حیدرکا مسلم لیگ ن سے کوئی تعلق نہیں ہے، تسنیم حیدر کے پاس ثبوت ہیں تو جےآئی ٹی کے قانونی فورم پرپیش کریں، تصویر میں نظر آنے والا شخص پی ٹی آئی لندن کا آرگنائزر ہے۔
مریم اورنگزیب کا کہنا تھا کہ فیک نیوز سے ارشد شریف کے اصل قاتلوں سے توجہ ہٹائی نہیں جاسکتی۔
مسلم لیگ ن برطانیہ کے صدر زبیر گل نے بھی ایک بیان میں کہا ہےکہ تسنیم حیدر مسلم لیگ ن کے ترجمان ہرگز نہیں، تسنیم حیدر کے الزامات پر انہیں برطانوی عدالت لے کر جائیں گے۔
زبیر گل کا کہنا تھا کہ یہ ڈرامہ ارشد شریف کے اصل قاتلوں سے توجہ ہٹانے کے لیے رچایا گیا ہے، تسنیم حیدر کے دائیں، بائیں بیٹھےدونوں افراد پاکستان تحریک انصاف کے لیڈر ہیں جو لندن میں نواز شریف کےگھر کے باہر مظاہرے کراتے ہیں۔
یاد رہے کہ آج لندن میں پریس کانفرنس کرتے ہوئے تسنیم حیدر کا کہنا تھا کہ عمران خان اور ارشد شریف کے قتل کی منصوبہ بندی لند ن میں کی گئی، میٹنگ میں نواز شریف بھی موجود تھے، انہوں نے مجھے کہا کہ ارشد شریف اور عمران خان کو آرمی چیف کی تعیناتی سے قبل رستے سے ہٹانا ہے۔
