سعودی عرب کے شہر جدہ میں تیز ہواؤں اور بارشوں سے دو افراد ہلاک ہوگئے، حکام نے تمام فلائٹس منسوخ کردیں۔
حکام کے مطابق مکہ جانے والی سڑکیں بھی بند کردی گئی ہیں، سوشل میڈیا پر جاری ہونے والی ویڈیوز میں طوفانی بارش کے بعد سڑکوں پر جمع پانی دیکھا جاسکتا ہے جس میں گاڑیاں تیر رہی ہیں۔
شاہ عبدالعزیز ایئرپورٹ انتظامیہ نے بیان جاری کیا کہ موسمی صورتحال کی وجہ سے کچھ پروازیں معطل کی گئی ہیں۔
فجر سے قبل ہی حکام نے طوفانی موسم کے پیش نظر جدہ میں اسکول اور یونیورسٹیاں بند رکھنے کا اعلان کر دیا تھا۔
اس پورے ہفتے مزید بارشوں کا امکان ہے، جمعہ کی موسمی پیشگوئی کے مطابق دوپہر تک مزید طوفانی بارش ہوگی۔
