اسلام آباد ہائی کورٹ نے متنازع ٹویٹ کیس میں پی ٹی آئی رہنما و سینیٹر اعظم سواتی کی درخواستِ ضمانت پر فیصلہ محفوظ کر لیا۔

اسلام آباد ہائی کورٹ کے چیف جسٹس عامر فاروق نے کیس کی سماعت کی۔دورانِ سماعت اسپیشل پراسیکیوٹر عدالت میں پیش نہ ہوئے، جبکہ اعظم سواتی کے وکیل بابر اعوان پیش ہوئے جنہوں نے عدالت سے اجازت لی کہ اعظم سواتی کے بیٹے عدالت کے سامنے اپنا مؤقف رکھنا چاہتے ہیں۔

اجازت ملنے کے بعد اعظم سواتی کے صاحبزادے نے عدالت کو بتایا کہ میرے والد نے ایک خط لکھا تھا، عدالت کی اجازت سے خط پڑھنا چاہتا ہوں۔اسلام آباد ہائی کورٹ کے چیف جسٹس عامر فاروق نے کہا کہ خط عدالت کے سامنے موجود ہے، اس معاملے کو ہمیشہ کے لیے طے کرنا چاہتے ہیں، اس پر لارجر بینچ تشکیل دیں گے، خط آ جاتا ہے کہ جج جانبدار ہے، اس قسم کے خطوط عدالت عمومی طور پر نہیں دیکھتی۔

بابر اعوان نے استدعا کی کہ عدالت آج ہی اس معاملے کو دیکھ لے۔اسلام آباد ہائی کورٹ نے کہا کہ آج ہی لارجر بینچ کی تشکیل ممکن نہیں۔

سواتی کے بیٹے نے چیف جسٹس کیخلاف خط واپس لے لیا
بابر اعوان نے عدالت کو بتایا کہ اعظم سواتی کے بیٹے سے میں نے درخواست کی ہے کہ وہ یہ خط واپس لے لیں۔جس پر اعظم سواتی کے بیٹے نے چیف جسٹس اسلام آباد ہائی کورٹ پر عدم اعتماد کا خط واپس لے لیا۔جس کے بعد اعظم سواتی کے وکیل بابر اعوان نے چیف جسٹس کے سامنے ہی دلائل دیتے ہوئے کہا کہ سندھ اور بلوچستان کی ہائی کورٹس نے اعظم سواتی کے خلاف مقدمے ختم کر دیے، انہوں نے جیب سے ایک کمپلینٹ نکالی اور مقدمہ بنا دیا، میں نے کبھی ایسی ایف آئی آر نہیں دیکھی جس میں ٹائم اور وقوعہ کی جگہ نہ لکھی ہو۔چیف جسٹس اسلام آباد نے بابر اعوان سے سوال کیا کہ آپ یہ کہہ رہے ہیں کہ ایس او پیز کو فالو نہیں کیا گیا؟

بابر اعوان نے جواب دیا کہ جی بالکل! مجھے انہوں نے بتانا ہے کہ میرے مؤکل کے خلاف کیا چارجز ہیں، اس کیس میں واجب عمل ہی نہیں ہے تو فیئر ٹرائل کہاں سے ہو گا، قانون کے سامنے کوئی اچھا برا نہیں جب تک اس پر جرم ثابت نہ ہو جائے۔دورانِ سماعت ڈپٹی اٹارنی جنرل نے عدالت سے دلائل کے لیے مزید وقت دینے کی استدعا کر دی۔

عدالت نے استفسار کیا کہ چالان کی کیا پوزیشن ہے؟ایف آئی اے حکام نے بتایا کہ 24 دسمبر کو چالان جمع ہو چکا، کل 3 جنوری کو سماعت ہے۔

ڈپٹی اٹارنی جنرل نے عدالت کو بتایا کہ اعظم سواتی نے جرم دوبارہ کیا ہے، ان کا پہلے بھی ایک کیس زیرِ سماعت ہے۔ایف آئی اے حکام نے بتایا کہ اعظم سواتی نے ٹوئٹر اکاؤنٹ سرینڈر نہیں کیا۔عدالت نے ایف آئی اے حکام سے استفسار کیا کہ آپ نے پہلے خود ہی فزیکل ریمانڈ ختم کیا، کیا کوئی ٹیمپرنگ کا چانس ہے؟