یورپی یونین نے مسجد اقصیٰ سے متعلق صورتحال پر تشویش کا اظہار کرتے ہوئے اسرائیلی حکومت پر زور دیا ہے کہ وہ مسجد اقصیٰ میں صورتحال کو خراب کرنے سے باز رہے۔
یہ بات آج یورپی خارجہ امور کے ترجمان نے برسلز میں نیوز کانفرنس کے دوران ایک سوال کے جواب میں کہی۔
یورپین ایکسٹرنل ایکشن سروس کے ترجمان پیٹر سٹانو نے اس حوالے سے پوچھے گئے ایک سوال کے جواب میں کہا کہ یورپی یونین کو اسرائیلی سیکیورٹی منسٹر اتامار بن گیور کے مسجد اقصیٰ کے دورے کے بعد پیدا ہونے والی صورتحال پر سخت تشویش ہے۔
ترجمان نے کہا کہ یورپی یونین اس دورے کو ناصرف موجودہ صورتحال بلکہ نئی اسرائیلی حکومت کے اقدامات کے طور پر بھی دیکھ رہی ہے۔
ترجمان نے مزید کہا کہ یورپی یونین کے مطابق مقدس مقامات کی صورتحال کو جوں کا توں رکھنا بہت ضروری ہے لیکن یہ اقدامات اس کے خلاف ہیں۔
ان کا کہنا تھا کہ گزشتہ ہفتے میں اس کے نتیجے میں بڑھتا ہوا تناؤ اور اموات اس کی عکاس ہیں۔
ترجمان نے اس بات پر زور دیا کہ تمام فریقین صورتحال کو خراب ہونے سے بچائیں۔
