ایلون مسک نے آنے والے ہفتوں میں ٹوئٹر میں متعدد نئی تبدیلیاں لانے کا اعلان کیا ہے۔

ٹوئٹر کے مالک نے ایک ٹوئٹ میں بتایا کہ سوشل میڈیا پلیٹ فارم کے یوزر انٹرفیس کو بدلا جارہا ہے۔

انہوں نے کہا کہ فروری کے شروع میں ٹوئٹر میں زیادہ طویل ٹوئٹس کا فیچر متعارف کرایا جائے گا۔

اس فیچر کا عندیہ ایلون مسک کی جانب سے نومبر 2022ء سے دیا جارہا ہے اور اب انہوں نے اس کی تاریخ کے بارے میں بتایا۔

مگر انہوں نے یہ نہیں بتایا کہ ٹوئٹ کے حروف 280 سے بڑھا کر کتنے کیے جاسکتے ہیں۔

پہلے ایک ٹوئٹ میں صرف 140 حروف استعمال ہوسکتے تھے، 2017ء میں حروف کی تعداد 280 کی گئی تھی۔

زیادہ بڑی تحریر کے لیے لوگوں کو ایک ہی تھریڈ میں کئی ٹوئٹس کرنا ہوتے ہیں۔

ایلون مسک نے بتایا کہ آئندہ ہفتے سے ٹوئٹر میں دائیں بائیں swipe کرکے نیوز فیڈ کے مختلف سیکشنز تک رسائی دی جائے گی۔