بولی وڈ کے ’بابا‘ کہلانے والے اداکار سنجے دت نے انکشاف کیا ہے کہ جب دو سال قبل ان میں کینسر کی تشخیص ہوئی تھی تو انہوں نے موذی مرض کا علاج کروانے کے بجائے مرنے کو ترجیح دی تھی۔
سنجے دت میں ستمبر 2020ء میں کینسر کا شکار ہوگئے تھے اور انہوں نے اکتوبر کے وسط میں اس کی تصدیق کی تھی۔
تاہم محض تین ہفتوں بعد ہی انہوں نے سوشل میڈیا پوسٹ کے ذریعے اس بات کی بھی تصدیق کی تھی کہ وہ کینسر سے صحت یاب ہوگئے۔
سنجے دت کی جانب سے محض ایک ماہ میں کینسر سے صحت یاب ہونے کی تصدیق کیے جانے پر کئی لوگ حیران بھی رہ گئے تھے، تاہم ساتھ ہی مداحوں نے ان کے لیے نیک خواہشات کا اظہار بھی کیا تھا۔
اب صحت یاب ہونے کے دو سال بعد انہوں نے پہلی بار اپنے کینسر کے شکار ہونے اور اس کے علاج سے متعلق کھل کر بات کی ہے اور بتایا ہے کہ وہ اس کا علاج ہی نہیں کروانا چاہتے تھے۔
سنجے دت نے ایک تقریب میں بات کرتے ہوئے بتایا کہ ان دنوں وہ اپنی فلم ’شمشیرا‘ کی شوٹنگ میں مصروف تھے کہ انہیں سانس لینے کی تکلیف کے باعث ہسپتال لے جایا گیا، جہاں ان کے ساتھ خاندان کا کوئی بھی فرد نہیں تھا۔
My heart is filled with gratitude as I share this news with all of you today. Thank you 🙏🏻 pic.twitter.com/81sGvWWpoe
— Sanjay Dutt (@duttsanjay) October 21, 2020
ان کے مطابق ڈاکٹروں کے چیک اپ کے بعد ان میں کینسر کی تشخیص ہوئی اور اہل خانہ کا کوئی فرد ساتھ نہ ہونے کی وجہ سے انہیں ابتدائی طور پر مکمل معلومات فراہم نہیں کی گئی، تاہم بعد میں ایک ڈاکٹر نے آکر انہیں بتایا کہ ان میں کینسر کی تشخیص ہوئی ہے۔
سنجے دت کے مطابق کینسر کا لفظ سنتے ہی انہوں نے اس کا علاج کروانے کے بجائے مرنے کو ترجیح دی اور خود سے وعدہ کیا کہ وہ کیموتھراپی اور دیگر علاج نہیں کروائیں گے۔
بولی وڈ بابا کا کہنا تھا کہ چوں کہ ان کی والدہ اداکارہ نرگس دت بھی 1981ء میں کینسر جب کہ ان کی پہلی اہلیہ اداکارہ ریچا شرما بھی 1996ء میں کینسر میں چل بسیں تھیں، اس لیے انہیں تکلیف اور موت کا احساس تھا اور انہوں نے علاج کے بجائے مرنے کو ترجیح دی۔
سنجے دت نے بتایا کہ انہیں آگاہ کیے جانے کے کافی گھنٹوں بعد ان کی بہن ہسپتال پہنچیں جب کہ بعد ازاں ان کی اہلیہ منایا دت بھی دبئی سے ممبئی پہنچ گئیں اور ان کے پورے خاندان کے لیے ان کی بیماری کی خبر قیامت سے کم نہیں تھی۔
اداکار کے مطابق ان کے اہل خانہ ان کی بیماری کا سن کر بے حال ہوگئے اور سب کے چہرے اتر گئے، وہ کمزور پڑگئے، جس کے بعد انہوں نے خود ہمت پکڑی اور بہادری سے کینسر کا مقابلہ کرنے کا عزم کیا۔
سنجے دت نے بتایا کہ ان کی اہلیہ نے ان کے لیے جذباتی نوٹ لکھا اور انہیں بہادر اداکار اور شخص بھی قرار دیا اور انہوں نے ان کے سامنے بہادر بننے کا ڈراما بھی کیا لیکن وہ سب کو سمجھ گئے اور خود بہادر بن کر کینسر کو شکست دینے کا عزم کیا۔
انہوں نے یہ بھی بتایا کہ ان کی جانب سے کینسر کا علاج کروانے سے انکار کا سن کر ڈاکٹر نے انہیں اداکار ریتیک روشن کے والد فلم ساز راکیش روشن کی مثال دی اور انہیں ہمت دی کہ وہ بھی کینسر کو شکست دے سکتے ہیں۔
تقریب کے دوران سنجے دت کا علاج کرنے والی ٹیم میں شامل ایک ڈاکٹر نے بتایا کہ سنجے دت کیموتھراپی کے دوران ڈاکٹرز کی جانب سے بتائی گئی ورزش بھی نہیں کرتے تھے اور علاج کروانے سے کتراتے تھے لیکن پھر انہیں علاج کی اہمیت کا اندازہ ہوا۔
سنجے دت نے تقریب کے اختتام پر کہا کہ انہوں نے عوام کو حالات کا مقابلہ کرنے کے لیے خود میں کینسر کی تشخیص کی کہانی سنائی ہے، تاکہ عام افراد ان کی کہانی سن کر حوصلے بلند رکھیں۔
