پاکستان پیپلز پارٹی کے رہنما سعید غنی کا کہنا ہے کہ جو ہمارے لوگ جیت کرآئے ہیں ان میں نجمی عالم پارٹی کے سینیئر ممبر ہیں۔

سعید غنی نے کہا کہ اگر ہمارے ممبران میں سے میئر کا نام آئے گا تو نجمی عالم کا نام اوپر ہوگا۔سعید غنی نے مزید کہا کہ کراچی کے میئر کیلئے امیدوار کا حتمی اعلان پارٹی قیادت کرے گی۔
نتائج کے مطابق پیپلزپارٹی 93 یوسیز میں کامیابی کے بعد سرفہرست ہے جب کہ جماعت اسلامی 86 یوسیز میں کامیابی کے بعد دوسرے نمبرپر ہے۔
پاکستان تحریک انصاف (پی ٹی آئی)کو کراچی ڈویژن میں 40 یوسیز پرکامیابی ملی ہے جب کہ مسلم لیگ ن نے7، جمعیت علمائے اسلام نے 3 اور تحریک لبیک نے 2 نشستوں پرکامیابی حاصل کی ہے۔

ان کے علاوہ مہاجر قومی موومنٹ ایک یوسی پر اور آزاد امیدوار3 یوسیز پرکامیاب ہوئے ہیں۔

الیکشن کمیشن کے مطابق شہر کی 246 میں سے 235 یونین کمیٹیز میں انتخابات ہوئے جب کہ 10 نشستوں پر امیدواروں کے انتقال کی وجہ سے انتخابات ملتوی ہوئے، ایک نشست پر پیپلزپارٹی کا چیئرمین پینل بلا مقابلہ جیت چکا ہے۔