پاکستان سپر لیگ کی 6 فرنچائزز نے پی ایس ایل 8 کیلئے جزوی طور پر یا مکمل طور پر عدم دستیاب ہوجانے والے پلیئرز کی جگہ متبادل کھلاڑیوں کا انتخاب کرلیا ہے، ٹیموں نے دو، دو مزید سپلیمنٹری پلیئرز بھی اسکواڈ میں شامل کرلیے ہیں۔
پاکستان سپر لیگ کیلئے ری پلیسمنٹ اور سپلیمنٹری ڈرافٹ بدھ کو کانفرنس کال پر منعقد ہوئے۔
پلاٹینم کیٹیگری میں لاہور قلندرز نے راشد خان کی جگہ سیم بلنگز کو جزوی طور پر اسکواڈ میں شامل کرلیا ہے، پشاور زلمی نے رومان پاول کی جگہ رچرڈ گلیسن، اسلام آباد نے رحمٰن اللّٰہ گرباز اور ایلیکس ہیلز کی جگہ ٹیمال ملز اور گس ایٹکنسن جبکہ ملتان نےڈیوڈ ملر کی جگہ اظہار الحق نوید کو شامل کرلیا ہے، کوئٹہ گلیڈی ایٹرز نے جزوی عدم دستیاب ونندو ہسارانگا کی جگہ کسی کو پک نہیں کیا۔
ڈائمنڈ کیٹیگری میں کوئٹہ گلیڈی ایٹرز نے جیسن روئے اور اوڈین اسمتھ کی جگہ ڈیوائن پریٹوریئس اور ول جیکس کو شامل کیا ہے۔
گولڈ میں ملتان سلطانز نے ٹم ڈیوڈ اور اکیل حسین کا متبادل نہیں چنا۔ لاہور قلندرز نے انگلینڈ کے ہیری بروک کی جگہ جنوبی افریقا کے شان ڈیڈزویل کو پک کیا جبکہ کوئٹہ نے نوان تھسارا کو ٹیم میں شامل کرلیا۔
دیگر ری پلیسمنٹ پلیئرز میں قلندرز نے جارڈن کاکس کی جگہ کوشال مینڈس، ملتان سلطانز نے عادل رشید کی جگہ وائن پارنیل جبکہ کراچی کنگز نے تبریز شمسی کی جگہ فیصل اکرم کو جزوی طور پر اسکواڈ میں رکھا ہے۔
ایلیکس ہیلز 26 فروری سے پی ایس ایل جوائن کریں گے، ٹم ڈیوڈ 3 مارچ کو ملتان سلطانز جوائن کریں گے، ونندو ہسارانگا 3 مارچ تک پی ایس ایل کھیلیں گے۔
پی ایس ایل فرنچائزز نے بدھ کو مزید دو، دو سپلیمنٹری پلیئرز بھی اسکواڈز میں شامل کیے ہیں۔ پشاور زلمی نے حارث سہیل اور خرم شہزاد، لاہور قلندرز نے احسن بھٹی، اسلام آباد یونائیٹڈ نے ٹوم کرن اور ظفر گوہر، کراچی کنگز نے بین کٹنگ اور موسیٰ خان، کوئٹہ گلیڈی ایٹرز نے سعود شکیل اور قیس احمد جبکہ ملتان سلطانز نے عماد بٹ اور کیرون پولارڈ کو اسکواڈ کا حصہ بنایا ہے۔
