ڈاکٹر حیدر عباسی نے مزید کہا کہ مریض کا تعلق فیصل آباد سے ہے اور وہ اس وقت آئسولیشن وارڈ میں ہے، اس کی حالت مستحکم ہے اور بیماری کا ٹیسٹ منفی آنے پر اسے ڈسچارج کردیا جائے گا۔

انہوں نے میڈیا کو بتایا کہ حکام ایسے افراد کا سراغ لگا رہے ہیں جو ممکنہ طور پر مریض کے ساتھ رابطے میں آئے ہوں گے اور انہیں وائرس کا نتیجہ منفی آنے تک الگ تھلگ رکھا جائے گا۔

پاکستان میں ابھی تک مقامی طور پر منتقل ہونے والا کیس رپورٹ نہیں ہوا اور اب تک رپورٹ ہونے والے تمام کیسز مشرق وسطیٰ کے ممالک سے آنے والے مسافروں کے ہیں۔

وزارت قومی صحت کے ترجمان ساجد شاہ نے کہا کہ وزارت نے پہلے ہی داخلی مقامات پر سخت نگرانی کا حکم دیا ہے تاکہ ممکنہ وائرس کیریئرز کی شناخت کو یقینی بنایا جا سکے۔