خیبرپختونخوا کابینہ نے وزرا کی مراعات میں اضافے سے متعلق بل کی منظوری دے دی۔
تفصیلات کے مطابق کابینہ ممبران کے لیے گھروں کے کرائے کے لیے رقم 70 ہزار سے بڑھا کر 2 لاکھ کر دی گئی، اطلاق ان کابینہ اراکین کے لیے جنہیں سرکاری گھر آلاٹ نہیں کیا گیا۔
رپورٹ کے مطابق جن وزرا کو سرکاری گھر آلاٹ نہیں کیا گیا، انہیں 2 لاکھ روپے تک گھر کرائے پر لینے کی اجازت ہوگی، رقم میں یوٹیلٹی بلز بھی شامل ہوں گے۔
اس کے علاوہ کابینہ ارکان کے گھروں کی تزئین و آرائش کی رقم 5 لاکھ سے بڑھا کر 10 لاکھ کرنے کی بھی منظوری دی گئی ہے۔
بل کی منظوری وزیر اعلیٰ علی امین گنڈاپور کی زیر صدارت ہونے والے کابینہ اجلاس میں دی گئی، بل کو اب صوبائی اسمبلی میں منظوری کے لیے پیش کیا جائے گا۔