کراچی میں این اے 241 میں مبینہ دھاندلی کے کیس میں پاکستان تحریک انصاف (پی ٹی آئی) کے امیدوار خرم شیر زمان کی درخواست پر سندھ ہائیکورٹ نے الیکشن کمیشن کا فیصلہ معطل کردیا۔

تفصیلات کے مطابق عدالت عالیہ کے 2 رکنی بینچ نے الیکشن کمیشن کا فیصلہ معطل کردیا، سندھ ہائیکورٹ کے 2 رکنی بینچ نے خرم شیر زمان کی درخواست پرفیصلہ سنایا۔

سندھ ہائیکورٹ نے الیکشن کمیشن، وفاقی حکومت اور دیگر فریقین کو نوٹس جاری کردیے، عدالت نے فریقین سے 30 دسمبر تک جواب طلب کرلیا۔

واضح رہے کہ پی ٹی آئی کے رہنما خرم شیر زمان نے سندھ ہائیکورٹ میں دائر کی گئی درخواست میں موقف اپنایا تھا کہ الیکشن کمیشن کو انتخابی ٹربیونل کا جج تبدیل کرنے سے روکا جائے۔

ان کے وکیل کے ذریعے دائر درخواست میں کہا گیا تھا کہ جسٹس عدنان اقبال چوہدری نے انتخابی عذرداری کی قانون کے مطابق سماعت کی ہے، الیکشن کمیشن من پسند فیصلے کے لیے جسٹس عدنان اقبال چوہدری کو ہٹانا چاہتا ہے۔

یاد رہے کہ این اے 241 میں دھاندلی کے خلاف خرم شیر زمان نے انتخابی عذرداری دائر کر رکھی ہے، خرم شیر زمان نے پیپلز پارٹی کے رکن قومی اسمبلی مرزا اختیار بیگ کی کامیابی کوچیلنج کیا ہے۔