پاکستان پیپلز پارٹی کی رکن سندھ اسمبلی شرمیلا فاروقی نے والدہ انیسہ فاروقی کے ساتھ نامناسب انداز میں ویڈیو بنانے کے معاملے پر اداکارہ و ٹی وی میزبان نادیہ خان کے خلاف قانونی کارروائی کا اعلان کردیا ہے۔
یاد رہے کہ اداکارہ نادیہ خان کی جانب سے رکن سندھ اسمبلی کی والدہ کے ہمراہ چند دن قبل اداکارہ صبور علی اور علی انصاری کی شادی کے دوران ویڈیو بنائی گئی تھی، جس میں ان کے میک اپ کا تمسخر اڑایا گیا تھا۔
سوشل میڈیا پر وائرل ویڈیو میں دیکھا جا سکتا ہے کہ اداکارہ شرمیلا کی والدہ سے طنزاً پوچھتی ہیں کہ آپ کا میک اپ کس نے کیا ہے، تو وہ جواب دیتی ہیں کہ میں نے خود کیاہے۔ اگلے ہی لمحے اداکارہ پھر پوچھتی ہیں کہ یہ آپ نے کس سے سیکھا ہے، تو وہ جواباً کہتی ہیں کہ میں نے میک اپ کرنا شرمیلا سے سیکھا ہے۔
ویڈیو سوشل میڈیا پر وائرل ہونے کے بعد صارفین کی جانب سے اداکارہ نادیہ خان کے عمل پر کڑی تنقید کی جا رہی ہے، شرمیلا فاروقی نے والدہ کا مذاق اڑانے اور ان کی ویڈیو سوشل میڈیا پر شیئر کرنے کے خلاف ایف آئی اے کے سائبر کرائم ونگ سے رجوع کرنے کا فیصلہ کیا ہے۔
شرمیلا فارقی کا میڈیا سے گفتگو کرتے ہوئے نادیہ خان کے رویے کو سستی شہرت کا طریقہ قرار دیتے ہوئے ان کے لیے سخت الفاظ بھی استعمال کئے۔شرمیلا فاروقی کا کہنا تھا کہ نادیہ خان کو ایک عمر رسیدہ خاتون کے ہمراہ نامناسب انداز میں ویڈیو بنانے سے قبل کچھ شرم آنی چاہیے تھی، انہیں سستی شہرت کیلئے ایسا رویہ نہیں اختیار کرنا چاہیے تھا۔
