سندھ کی گلوکارہ نرملا مگھانی نے دعویٰ کیا ہے کہ تو جھوم گانے کی دھن میری دھن سے کاپی کرکے بنائی گئی ہے، جس کا مجھے کریڈٹ دیا جائے۔
سندھ کے شہرتھر پارکر سے تعلق رکھنے والی گلوکارہ نرملا مگھانی نے دعویٰ کیا ہے کہ انہوں نے کوک اسٹوڈیو سیزن 14 کے پروڈیوسر ذوالفقار خان المعروف ذولفی کو جون 2021ء میں اپنی ایک دھن بھیجی تھی، تاکہ میری سلیکشن ہو جائے، ذولفی صاحب نے میرے میسجز دیکھ لئے لیکن مجھے کوئی جواب نہیں دیا، بعد ازاں میری دھن کاپی کر کے اس پر تو جھوم گانا ریلیز کر دیا گیا۔ دوسری جانب کوک اسٹوڈیو کے پروڈیوسر ذولفی کا کہنا ہے کہ انہوں نے کسی بھی دوسرے موسیقار یا گلوکار کی دھن کی کاپی نہیں کی اور کوک اسٹوڈیو کے تمام گانے ان کی اپنی تخلیق کردہ دھن پر مبنی ہیں۔
کوک سٹوڈیو کی جانب سے جاری بیان میں کہا گیا ہے کہ نرملا کی جانب سے جاری کی گئی ویڈیو میں دکھایا گیا تھا کہ انہوں نے ویڈیو جون 2021ء میں بھیجی ہے، جبکہ زلفی اور عبداللہ س سے ایک ماہ قبل یعنی مئی میں دھن کو مرتب کر رہے تھے، جس سے ثابت ہوتا ہے کہ نرملا کا دعویٰ غلط ہے ۔
نجی جریدے انڈیپنڈنٹ اردو کے ساتھ گفتگو کرتے ہوئے نرملا کا کہنا تھا کہ جون میں جب مجھے معلوم ہوا کہ زلفی اس مرتبہ کوک سٹوڈیو کے پروڈیوسر ہوں گے تو میں نے انہیں اپنی کمپوزیشن بھیجی جس کا جواب نہیں آیا، اب جبکہ میں نے یہ گانا سنا تو میں فوراً پہچان گئی کہ یہ تو میری کمپوزیشن ہے۔انہوں نے مزید بتایا کہ میں نے زلفی کو دوبارہ میسج کیا اور کہا کہ یہ میری کمپوزیشن ہے جس کا انہوں نے کوئی جواب نہیں دیا۔ اگلے دن مجھے ان کا جواب موصول ہوا جس میں ان کا کہنا تھا کہ میں نے آپ کی فائل ڈاؤن لوڈ ہی نہیں کی تھی، ان کا کہنا تھا کہ میں اپنا حق حاصل کرنے کیلئے عدالت جاؤں گی۔
#NirmalaMaghani #cokestudio14 #TuJhoom pic.twitter.com/4vzQTRAjJk
— Nirmala Maghani (@NirmalaMaghani) January 20, 2022
ٹوئٹر پر جاری اپنے بیان میں نرملا مگھانی کا کہنا تھا کہ مجھے اس کا معاوضہ نہیں چاہیے، مجھے میرے کام کا کریڈٹ دیا جائے۔
میرے گانے کی دھن جو میں @cokestudio کے پروڈیوسر زلفی کو بطور نمونہ جون 2021 میں بھیجی تھیں چوری کر کے کوک سٹوڈیو کے گانے “تو جھوم” میں استعمال کی جا ر ہی ہیں۔ مجھے کوئی پیسے نہیں صرف کریڈٹ دیا جائے۔ میری آواز بنیں 🙏#NirmalaMaghani
— Nirmala Maghani (@NirmalaMaghani) January 19, 2022
