آئی سی سی انڈر 19 ورلڈ کپ میں گرین شرٹس کی عمدہ کارکردگی کا سلسلہ جاری ہے اور ٹیم نے فائنل ایٹ کے لئے کوالیفائی کرلیا ہے۔
تفصیلات کے مطابق پاکستان انڈر 19 کرکٹ ٹیم نے افغانستان کو 24 رنز سے شکست دے کر آئی سی سی مینز انڈر 19 ورلڈ کپ کے کوارٹر فائنل میں رسائی حاصل کرلی ہے۔
240 رنز کے تعاقب میں افغانستان انڈر 19 کی ٹیم مقررہ 50 اوورز میں 9 وکٹوں کے نقصان پر 215 رنز ہی بناسکی، اویس علی نے تین جبکہ قاسم اکرم نے دو اور معاذ صداقت نے ایک وکٹ حاصل کی۔
Congratulations Pakistan U19 – an impressive 24-run win over Afghanistan 🇵🇰👏#U19CWC Group C. #PakistanFutureStars pic.twitter.com/9wfU2W1RUL
— Pakistan Cricket (@TheRealPCB) January 20, 2022
بلال سعیدی 42 اور اعجاز احمدزئی 39 رنز بنا کر نمایاں رہے۔اس سے قبل قومی انڈر 19 کرکٹ ٹیم کے کپتان قاسم اکرم نے ٹاس جیت کر پہلے بیٹنگ کا فیصلہ کیا تو ٹاپ آرڈر عبدالفصیح کی نصف سنچری کی بدولت پاکستان نے مقررہ پچاس اوورز میں 9 وکٹوں کے نقصان پر 239 رنز بنائے۔
عبدالفصیح نے 6 چوکوں اور 2 چھکوں کی بدولت 68 رنز کی اننگز کھیلی، اوپنر احمد شہزاد نے 43 اور کپتان قاسم اکرم نے 38 رنز بنائے۔اختتامی اوورز میں معاذ صداقت کی 37 گیندوں پر 7 چوکوں کی مدد سے 42 رنز کی ناقابل شکست اننگز نے بھی اسکور کو 230 کے پار لے جانے میں مدد کی۔
حریف ٹیم کے اظہار الحق نے تین جبکہ نور احمد اور نوید زادران نے دو دو کھلاڑیوں کو آؤٹ کیا۔
