بالی وڈ کے کھلاڑی اداکار اکشے کمار نے بالی وڈ سے ریٹائرمنٹ لینے کے متعلق گفتگو کی ہے۔

حالیہ انٹرویو میں اکشے کمار نے کہا کہ جب مداح مجھ سے سوال کرتے ہیں کہ 54 سال کی عمر میں بھی اتناکام کیسے کر لیتے ہیں، تو مجھے حیرانگی ہوتی ہے، انہوں نے کہا کہ اس عمر میں بھی بھرپور کام کرنا میرا انتخاب ہے، کیونکہ یہ میرا شوق ہے۔

اکشے کمار کا کہنا تھا کہ میں مزید پیسے کمانے کیلئے کام نہیں کر رہا، میں اپنا شوق پورا کرنے کیلئے کام کر رہا ہوں، کیونکہ مجھے صبح سویرے اٹھ کر کام پر جانا اچھا لگتا ہے۔ انہوں نے کہا اگر آپ روزانہ کام کر رہے ہوں تو آپ کے پاس کام کی آفرز بھی رہتی ہیں۔

بالی وڈ کھلاڑی کا کہنا تھا کہ آج میرے پاس سب کچھ ہے، چاہوں تو گھر بیٹھ کر آرام سے کھا سکتا ہوں، لیکن مجھ میں کام کا جذبہ ہے۔ انہوں نے کہا کہ جس دن مجھ میں کام کا جذبہ نہ رہا، مجھے لگا کہ میں کام دلچسپی سے نہیں کر پا رہا، تو میں خود فلم انڈسٹری کو خیر باد کہہ دوں گا۔