چین کے دارالحکومت بیجنگ میں میڈیا بریفنگ میں ترجمان چینی وزارت خارجہ  لیجیان ژاؤ کا کہنا تھا کہ عالمی برادری کو انسانی بنیادوں پر افغانستان کی مدد کرنی چاہیے جبکہ امریکہ اور اس کے اتحادیوں کو افغانستان میں تعمیر نو کی ذمہ داریاں پوری کرنی چاہئیں۔ ان کا کہنا تھا کہ دوشنبے میں پاکستان، چین اور روس کے وزرائے خارجہ جبکہ ایران کے سینئر مندوب نے مختلف ملاقاتوں میں خطے بالخصوص افغانستان میں قیام امن کیلئے مخلصانہ کوششیں کرنے پر اتفاق کیا ہے۔ تمام فریقین نے افغانستان میں جامع حکومت سازی پر بھی زور دیا اور کہا کہ افغانستان کی آزادی، سالمیت اور خود مختاری کا احترام کیا جانا چاہیے۔ مزید ان کا کہنا تھا کہ فریقین نے افغانستان سے دہشت گردی اور منشیات کی اسمگلنگ جیسے خطرات سے نمٹنے اور علاقائی استحکام اور پڑوسی ممالک کے جائز تحفظات اور مفادات کے تحفظ کے لیے کوششوں کو مربوط کرنے کی ضرورت پر بھی زور دیا۔