ٹی ٹونٹی ورلڈ کپ میں مایوس کن کارکردگی کے باعث بھارتی میڈیا کا دعویٰ ہے کہ کپتان ویرات کوہلی کو ٹی ٹونٹی کے ساتھ ون ڈے فارمیٹ کی کپتانی سے بھی ہٹادیا جائے گا۔
تفصیلات کے مطابق ورلڈ کپ میں خراب کارکردگی کے بعد شائقین کے ساتھ بھارتی کرکٹ بورڈ بھی ٹیم کی مجموعی کارکردگی بالخصوص ویرات کوہلی کی کارکردگی سے ناخوش ہے۔ بھارتی میڈیا کا کہنا ہے کہ ویرات کوہلی ٹی ٹونٹی کرکٹ فارمیٹ کی کپتانی سے علیحدگی کا فیصلہ تو خود ہی کر چکے ہیں، لیکن انہیں ون ڈے ٹیم کی کپتانی سے بھی ہٹا دیا جائے گا۔ رپورٹس میں مزید کہا گیا کہ اس کیلئے طریقہ کار یہ طے کیا جائے گا کہ بھارتی کرکٹ بورڈ اعلان کرے گا کہ آئندہ ٹی ٹونٹی اور ون ڈے ٹیمز کے کپتان الگ نہیں ہوں گے، اور اس طرح ون ڈے ٹیم کا کپتان بھی روہت شرما کو بنا دیا جائے گا۔
بھارتی کرکٹ بورڈ کے کل کے اجلاس میں نیوزی لینڈ کے ساتھ بھارت کی دوطرفہ سیریز کیلئے ٹیم کا اعلان کیا جائے گا جس کی قیادت روہت شرما کو سونپے جانے کا امکان ہے۔ میڈیا رپورٹس میں یہ بھی کہا گیا ہے کہ کوہلی کو صرف ٹیم کی کپتانی سے نہیں ہٹایا جا ئے بلکہ انہیں نیوزی لینڈ کے خلاف سیریز میں بھی شامل نہ کئے جانے کا امکان ہے۔ کوہلی کے علاوہ محمد شامی، بھمرا، کے ایل راہول، ایشون، ریشب پنت اور جڈیجا بھی نیوزی لینڈ کے خلاف انڈین ٹیم کےسکواڈ میں شامل نہیں ہوں گے۔
