امریکہ نے اپنی بڑی کمپنیوں پر سائبر حملوں کے جرم میں روس اور یوکرائین کے ہیکرز پر پابندیاں عائد کردی ہیں۔
روس کی خبررساں ایجنسی کی رپورٹ کے مطابق امریکی وزارت خزانہ نے روس کے شہری یوجنی پولینئن اور یوکرائین کے شہری یارسولو پر امریکی کمپنیوں پر سائبر حملوں اور کرپٹو کرنسی کے اعدادوشمار میں ہیر پھیر کے جرم پر پابندی عائد کر دی ہے۔
امریکی حکام کا کہنا ہے کہ یہ دونوں افراد ایک معروف ٹیکنالوجی کمپنی کے اہلکار ہیں جس نے مختلف اوقات میں امریکہ کی بڑی کمپنیوں کی ویب سائٹس کو ہیک کر کے ان کے ڈیٹا بیس کو نقصان پہنچایا۔ امریکہ کا مزید کہنا تھا کہ یہ افراد نہ صرف نجی کمپنیوں کو ہیک کرنے میں ملوث رہے ہیں بلکہ انہوں نے امریکی اداروں کی ویب سائٹس کو بھی ہیک کیا اور حساس ڈیٹا چوری کیا گیا۔
امریکی حکام کا یہ بھی کہنا ہے کہ یہ افراد روس کے سرکاری اداروں کی سرپرستی میں امریکی کمپنیوں اور اداروں کی وب سائٹس پر حملے کر رہے تھے جو کہ سائبر کرائمز کے سنگین جرائم کے ضمرے میں آتا ہے، مزید کہا کہ ان کے سائبر حملوں کے متعلق مزید تحقیقات کی جارہی ہیں، تفصیلات سامنے آنے پر آئندہ کا لائحہ عمل سامنے لایا جائے گا۔
