پاکستان میں یونان کے سفیر آندریاس پاپاستاورو نے آرمی چیف جنرل قمر جاوید باجوہ سے جی ایچ کیو راولپنڈی میں ملاقات کی۔ ملاقات میں خطے کے امن بالخصوص افغانستان کے امن و امان اور سلامتی ، باہمی دلچسپی کے امورسمیت مختلف شعبوں میں تعاون پر بات چیت کی گئی ۔ اس موقع پر آرمی چیف نے کہا کہ پاکستان اپنے بین الاقوامی شراکت داروں کیساتھ خطے میں امن و امان، افغان عوام کے مستحکم اور خوشحال مستقبل کو یقینی بنانے کیلئے پرعزم ہے۔
آرمی چیف کا مزید کہنا تھا کہ پاکستان ہر قسم کی بین الاقوامی سیاحت ، کھیلوں اور کاروباری سرگرمیوں کیلئے محفوظ ہے اور ہم مشترکہ مفاد کے تمام شعبوں میں صحت مند دو طرفہ تبادلے کی حوصلہ افزائی کرتے ہیں۔یونان کے سفیر نے مربوط قومی ردعمل کے ذریعے کورونا وائرس کی وبا پر قابو پانے میں پاکستان کی کوششوں کی تعریف کی اورافغان سےانخلاء کا کامیاب آپریشن اور علاقائی استحکام کی کوششوں میں پاکستان کے کردار کی بھی تعریف کی۔
