عالمی ادارہ برائے صحت (ڈبلیو ایچ او) کے حکام کا کہنا ہے کہ شمالی امریکہ اور یورپ میں منکی پاکس وائرس بنیادی طور پر جنسی تعلقات کے ذریعے پھیل رہا ہے، جس کے کم از کم ایک درجن ممالک میں تقریباً 200 تصدیق شدہ اور مشتبہ کیسز ہیں۔
گزشتہ ہفتے کے دوران یہ وباء پورے یورپ اور شمالی امریکہ میں تیزی سے پھیلی ہے اور توقع کی جاتی ہے کہ یہ اس سے کئی گنا زیادہ پھیلے گی۔ڈبلیو ایچ او کی جانب سے جاری بیان میں کہا گیا کہ برطانیہ میں منکی پاکس کے دو تصدیق شدہ اور ایک مشتبہ کیس کی اطلاع صرف 10 دن قبل ڈبلیو ایچ او کو دی گئی تھی، جو اس سال افریقہ سے باہر پہلا کیس ہے جہاں یہ وائرس عام طور پر پچھلے 40 سالوں میں کم سطح پر گردش کرتا رہا ہے۔
ڈبلیو ایچ او کی چیچک کی تحقیق پر کام کرنے والے ڈاکٹر روزامنڈ لیوس نے تنظیم کے سوشل میڈیا چینلز پر سوال و جواب کے سیشن میں کہا کہ ہم نے پچھلے پانچ سالوں میں یورپ میں صرف مسافروں میں کچھ کیسز دیکھے ہیں، لیکن یہ پہلا موقع ہے کہ ہم ایک ہی وقت میں کئی ممالک میں ایسے کیسز دیکھ رہے ہیں جنہوں نے افریقہ کے مقامی علاقوں کا سفر تک نہیں کیا۔
ڈبلیو ایچ او کو ایچ آئی وی، ہیپاٹائٹس اور دیگر جنسی طور پر منتقل ہونے والے انفیکشن کے بارے میں مشورہ دینے والے اینڈی سیل کہتے ہیں کہ وائرس لوگوں، جانوروں یا وائرس سے متاثرہ مواد کے قریبی رابطے سے پھیلتا ہے۔ یہ پھٹٰ ہوئی جلد، سانس کی نالی، آنکھوں، ناک اور منہ کے ذریعے جسم میں داخل ہوتا ہے۔ اگرچہ یہ خیال کیا جاتا ہے کہ سانس کی بوندوں کے ذریعے بھی انسان سے انسان میں منتقلی ہوتی ہے، لیکن اس طریقہ کار کے لیے طویل عرصے تک آمنے سامنے رابطے کی ضرورت ہوتی ہے، کیونکہ سی ڈی سی کے مطابق بوندیں چند فٹ سے زیادہ سفر نہیں کر سکتیں۔
ڈبلیو ایچ او کے عہدیداروں نے مزید بتایا کہ منکی پاکس کی ابتدائی علامات میں بخار، سر درد، کمر میں درد، پٹھوں میں درد اور کم توانائی شامل ہیں۔ یہ پھر چہرے، ہاتھوں، پیروں، آنکھوں، منہ یا جنسی اعضاء پر دانے کی طرف بڑھتا ہے جو ابھرے ہوئے ٹکڑوں، یا پیپولس میں بدل جاتا ہے، پھر چھالے بن جاتے ہیں جو اکثر چکن پاکس سے ملتے جلتے ہیں۔ اس کے بعد وہ ایک سفید سیال سے بھر سکتے ہیں، جو بعد میں پھوٹ جاتا ہے اور ختم ہو جاتا ہے۔
