وزیراعلی پرویز الہی اور مونس الہی سے چیئرمین پی سی بی رمیز راجہ کی ملاقات ہوئی۔ ملاقات میں پنجاب میں کھیلوں خصوصا کرکٹ کو فروغ دینے کیلئے اقدامات پر تبادلہ خیال کیا گیا۔
اس موقع پر وزیراعلیٰ چودھری پرویز الٰہی اور مونس الٰہی نے ایشیا کپ کے فائنل میچ کیلئے پاکستانی ٹیم کی جیت کیلئے نیک تمناؤں کا اظہار کیا۔ وزیراعلی نے کہا کہ یقین ہے کہ پاکستانی ٹیم ایشیا کپ جیت کر وطن لوٹے گی۔ میری نیک تمنائیں ٹیم کے ساتھ ہیں۔ کرکٹ کے فروغ کیلئے پی سی بی کے ساتھ مل کر اقدامات کئے جائیں گے۔
چیئرمین پی سی پی رمیزراجہ کا کہنا تھا کہ چودھری پرویز الٰہی کا سپورٹس کے فروغ کیلئے ویژن قابل تحسین ہے۔
ادھر صوبائی وزیر منیب سلطان چیمہ اور پارلیمنٹرین عامر سلطان چیمہ نے وزیراعلی چودھری پرویزالہی سے ملاقات کی۔ اس موقع پر وزیراعلی پنجاب چودھری پرویزالہی نے کہا کہ غیر معمولی بارشوں اور سیلاب سے بڑے پیمانے پر تباہی ہوئی۔ سیلاب متاثرہ علاقوں میں ریسکیو اینڈ ریلیف کے لئے جو کچھ انسانی بس میں ہوا، وہ کیا۔ انہوں نے کہا کہ وزیراعلیٰ فلڈ ریلیف فنڈ میں جمع ہونے والی رقم سے متاثرین سیلاب کی آبادکاری کریں گے۔
