آج قومی اسمبلی کے اجلاس میں اظہار خیال کرتے ہوئے وزیر خزانہ شوکت ترین کا کہنا تھا کہ سعودی عرب پاکستان کو موخر ادائیگیوں پر تیل فراہم کرے گا، اس مقصد کیلئے سعودی حکام کے ساتھ معاہدہ تکمیل کے قریب ہے جس کی تفصیلات دو سے تین روز میں آ جائیں گی۔
یاد رہے کہ 2019ء میں سعودی حکام کی جانب سے پاکستان کو موخر ادائیگیوں پر تیل فراہم کیا گیا تھا اور گذشتہ سال دونوں ممالک کے مابین تعلقات میں حائل پیچیدہ معاملات کی وجہ سے موخر ادائیگیوں پر تیل کی فراہمی کا عمل روک دیا گیا تھا۔ پھر رواں سال جون میں دونوں ممالک کے تعلقات میں بہتری کے باعث سعودی حکام نے یہ سہولت دوبارہ بحال کر دی تھی۔ معاہدے کے بعد سعودی حکومت پاکستان کو ایک سال کی موخر ادائیگی پر ڈیڑھ ارب ڈالر کا تیل فراہم کرے گی۔
