سپریم کورٹ آف پاکستان میں منشیات کے ملزمان کی سزاؤں سے متعلق کیس کی سماعت ہوئی جسٹس مظاہر نقوی نے اپنے ریمارکس میں کہا ہے کہ بھنگ تو بہت سی بیماریوں کا علاج ہے، انسانی اعصاب کے لیے قوت بخش ہے۔
تفصیلات کے مطابق جسٹس اعجاز الاحسن کی سربراہی میں سپریم کورٹ کے سات رکنی لارجربنچ نے منشیات کے ملزمان کی سزاؤں سے متعلق کیس کی سماعت کی۔عدالتِ عظمیٰ نے دورانِ سماعت سپریم کورٹ نے عدالتی معاونین کو تحریری معروضات جمع کرانے کا حکم دے دیا۔ اور کہا کہ سینیٹ کی ایک کمیٹی منشیات کے ملزمان سے متعلق قانون سازی کر رہی ہے، سینیٹ کی کمیٹی میں ہونے والی پیشرفت سے متعلق آگاہ کیا جائے۔
خواجہ حارث نے عدالت کو بتایا کہ حکومت جو قانون سازی کررہی ہے اس میں مختلف منشیات کی نوعیت کے مطابق سزائیں ہوں گی۔
جسٹس سجاد علی شاہ نے کہا کہ پہلے بھنگ اور ہیروئین کی سزا برابر تھی۔ اگر بھنگ اور ہیروئین کی سزا الگ الگ کی جارہی ہے تو یہ خوش آئند ہے۔ بھنگ ہیروئین سے کم خطرناک نشہ ہے
جسٹس مظاہرعلی اکبر نقوی نے اپنے ریمارکس میں کہا کہ بھنگ تو بہت سی بیماریوں کا علاج ہے۔ بھنگ انسانی اعصاب کیلئے قوت بخش ہے۔ مختلف ممالک میں بھنگ کو دوا کے طور پر استعمال کیا جاتا ہے۔
جسٹس جمال خان مندوخیل نے کہا کہ اب تو حکومت بھی بھنگ پر پالیسی بنا چکی ہے۔
عدالتی معاون اعتزاز احسن نے کہا کہ عدالت کو ایک دلچسپ واقعہ سنانا چاہتا ہوں، نواز شریف ہزاروں افراد کے ساتھ ضیاءالحق کی برسی کے لیے اسلام آباد آئے تھے، اطلاع ملی کہ زیرو پوائنٹ پر بسیں روک دی گئی ہیں، سیکیورٹی خدشات پر تشویش ہوئی تو آئی جی نے بتایا کہ بسوں میں بھنگ کاٹ کاٹ کر بھری جا رہی ہے۔
اعتزاز احسن کے واقعہ سنانے پر عدالت میں قہقہے گونجنے لگے۔
سپریم کورٹ آف پاکستان نے کیس کی سماعت جنوری کے آخری ہفتے تک ملتوی کر دی۔