وزیر خارجہ شاہ محمود قریشی نے کہا ہے کہ مقبوضہ جموں و کشمیر میں بھارت کی قابض افواج کی جانب سے انسانی حقوق کی سنگین خلاف ورزیاں جاری ہیں، نہتے کشمیری او آئی سی کی جانب دیکھ رہے ہیں، او آئی سی موثر کردار ادا کرے۔
اسلام آباد – (اے پی پی): وزیر خارجہ شاہ محمود قریشی نے جمعے کے روز سیکریٹری جنرل اور آئی سی حسین ابراہیم طہٰ سے ملاقات کی، جس میں ان کا کہنا تھا کہ ہم کشمیریوں کے لیے او آئی سی کی مسلسل حمایت کو سراہتے ہیں، او آئی سی کی قراردادوں اور بیانات سے نہتے کشمیریوں کی حوصلہ افزائی ہوئی۔ شاہ محمود قریشی نے کہا کہ 5 اگست 2019ء کے اپنے غیر قانونی اور یکطرفہ اقدامات کے بعد سے بھارت مقبوضہ کشمیر میں آبادیاتی تناسب کو غیر قانونی طور پر بدلنے کیلئے کوشاں ہے۔ ہندوستان کی جانب سے مقبوضہ جموں و کشمیر میں 9 لاکھ قابض افواج کے ذریعے انسانی حقوق کی سنگین اور منظم خلاف ورزیاں بدستور جاری ہیں۔ وزیر خارجہ نے کہا کہ آج نہتے کشمیری او آئی سی کی طرف دیکھ رہے ہیں، میں مقبوضہ جموں و کشمیر کے نہتے لوگوں کو بھارتی استبداد سے نجات دلانے کیلئے آپ سے بطور سیکرٹری جنرل او آئی سی ذاتی کاوشیں بروئے کار لانے کی درخواست کروں گا۔ پاکستان، اقوام متحدہ کی سلامتی کونسل کی قراردادوں کے مطابق کشمیر تنازعہ کے منصفانہ حل کا متقاضی ہے۔ بین الاقوامی برادری، مقبوضہ جموں و کشمیر میں انسانی حقوق کی سنگین خلاف ورزیوں کے مرتکب افراد کی جوابدہی اور مواخذے کیلئے اقدام اٹھائے۔
او آئی سی مسلم امہ کے مسائل حل کرانے کیلئے موثر کردار ادا کرے
وزیر خارجہ شاہ محمود قریشی نے کہا کہ او آئی سی مسلم دنیا کو درپیش مختلف چیلنجز بالخصوص اسلامو فوبیا، امن و سلامتی اور تنازعات کے حل کے سلسلے میں موثر تنظیم کے طور پر اپنا کردار ادا کرے، افغانستان میں معاشی تباہی کے اثرات پڑوسی ممالک، خطے اور دیگر دنیا پر مرتب ہوں گے،بین الاقوامی برادری، مقبوضہ جموں و کشمیر میں انسانی حقوق کی سنگین خلاف ورزیوں کے مرتکب افراد کی جوابدہی اور مواخذے کیلئے اقدام اٹھائے۔
A pleasure to welcome Sec Gen @OIC_OCI H.E Hissein Brahim Taha to Pakistan. I look forward to working closely for the success of the 17th Extraordinary Session of the CFM on Afghanistan. As a founding member, we are committed to the values & objectives of the OIC. #OICInPakistan pic.twitter.com/qfAHmokek1
— Shah Mahmood Qureshi (@SMQureshiPTI) December 17, 2021
ترجمان دفتر خارجہ کے مطابق وزیر خارجہ نے سیکرٹری جنرل او آئی سی کا منصب سنبھالنے پر حسین ابراہیم طہٰ کو مبارکباد دی اور کہا کہ ہمیں توقع ہے کہ او آئی سی آپ کی رہنمائی میں بین الاقوامی سطح پر مزید فعال ہو گی۔ شاہ محمود قریشی نے کہا کہ او آئی سی کے بانی رکن کے طور پر، پاکستان تنظیم کی اقدار اور مقاصد کی پاسداری کے لیے پرعزم ہے۔ پاکستان او آئی سی کو امت کی واحد اور موثر آواز کے طور پر فروغ دینے کے لیے بھی پرعزم ہے۔انہوں نے کہا کہ پاکستان 22-23 مارچ 2022 کو او آئی سی وزرائے خارجہ کونسل کے 48ویں اجلاس کی میزبانی کا منتظر ہے۔ یکے بعد دیگرے دو وزرائے خارجہ کونسل کے اجلاسوں کی میزبانی مسلم امہ کے مقاصد کو آگے بڑھانے کے لیے پاکستان کی سنجیدگی کا ثبوت ہے۔پاکستان او آئی سی کےمختلف رکن ممالک کے ساتھ باہمی طور پر سائنسی و اقتصادی تعاون کو فروغ دینے کا ارادہ رکھتا ہے۔اس سلسلے میں، آئی سی ٹی، طب، تعلیم، بھاری صنعتی اور زرعی مشینری کا تبادلہ پاکستان کی خصوصی دلچسپی کے شعبے ہیں۔
افغانستان کے استحکام کیلئے اس کے عالمی برادری سے سفارتی روابط ناگزیر ہیں
شاہ محمود قریشی نے افغانستان کی صورتحال کے حوالے سے کہا کہ افغانستان میں 40 سال سے جاری جنگ کو ختم کرنے اور افغانوں کو مفاہمت اور تعمیر نو کے قابل بنانے کا ایک موقع موجود ہے۔افغانستان کے ساتھ بین الاقوامی برادری کےسفارتی اور سیاسی رابطے افغانستان میں دیرپا امن اور استحکام کے حصول کے لیے ناگزیر ہیں۔ بین الاقوامی برادری کی توقعات اور افغانستان میں زمینی حقائق کے درمیان توازن قائم کرنے کی ضرورت ہے۔انہوں نے کہا کہ افغانستان کی معیشت کو شدید چیلنجز کا سامنا ہے۔ افغانستان میں معاشی تباہی کے اثرات پڑوسی ممالک، خطے اور دیگر دنیا پر مرتب ہوں گے۔
افغانستان کی مشروط امداد کرنا مناسب نہیں
وزیر خارجہ نے کہا کہ پاکستان ایک پڑوسی ملک کے طور پر افغانستان کو انسانی امداد کی فراہمی کے لیے کوششیں جاری رکھے ہوئے ہے۔پاکستان اقوام متحدہ، اور افغانستان کو انسانی امداد فراہم کرنے کے خواہشمند دیگر اداروں کے ذریعے افغانستان کو بین الاقوامی انسانی امداد کی فراہمی میں معاونت کیلئے تیار ہے، ہم سمجھتے ہیں کہ انسانی بنیادوں پرامداد کی فراہمی کو مشروط کرنا مناسب نہیں ہوگا۔ وزیر خارجہ نے کہا کہ افغان معیشت پر دباؤ کم کرنے کے ساتھ ساتھ بینکنگ سسٹم کی بحالی کے لیے میکانزم تلاش کرنے کی ضرورت ہے۔افغانستان میں امن و سلامتی کی صورتحال کو قابو میں لانے ، نئے سرے سے تنازعات کو روکنے اور افغان مہاجرین کے کے بڑے پیمانے پر اخراج کو روکنے کے لیے فوری اقدامات کرنا ہوں گے۔
