وزیراعلیٰ پنجاب سردار عثمان بزدار نے کہا ہے کہ  حکومتی اقدامات کے باعث اشیائے ضروریہ کی قیمتوں میں کمی ہورہی ہے،مہنگائی صرف پاکستان نہیں بلکہ پوری دنیا کا مسئلہ ہے۔

وزیراعلیٰ پنجاب سردار عثمان بزدار نے کہا ہے کہ پنجاب میں آٹا، چینی اور دیگر اشیائے ضروریہ مقررکردہ نرخوں پر دستیاب ہیں، مصنوعی مہنگائی کے ذمہ داروں کے خلاف بلا امتیاز کارروائی جارہی ہے۔عثمان بزدار نے کہا کہ ہمیں عوام کی مشکلات کا پورا احساس ہے، احساس راشن پروگرام سے عام آدمی کو حقیقی ریلیف ملے گا۔

انکا کہنا ہے کہ اپوزیشن نے کورونا، ڈینگی اور دیگر اہم ایشوز پر صرف سیاست چمکائی، یہ عناصر اب مہنگائی پر پوائنٹ اسکورنگ کررہے ہیں، اپوزیشن کو عوام کا نہیں اقتدار کا درد ہے۔وزیراعلیٰ پنجاب نے کہا کہ معیشت کی اے بی سی سے ناواقف اپوزیشن صرف سیاسی بیان بازی کررہی ہے، یہ لوگ صرف پاکستان کی ترقی کو روکنے کے درپے ہے، منفی سیاست کرنے والے یاد رکھیں کہ ان کی آر پار، استعفوں اور لانگ مارچ کی سیاست کی پاکستان میں کوئی گنجائش نہیں۔

انہوں نے مزید کہا کہ سابق ادوار میں سرکاری وسائل کو بے دردی سے لوٹا گیا، ماضی کے حکمرانوں نے اقتدار کو منی لانڈرنگ اور کک بیکس کے لئے استعمال کیا، وزیراعظم عمران خان کی قیادت میں موجودہ حکومت نے شفاف پاکستان کی بنیاد رکھی ہے۔