اسرائیل کی فوج نے مقبوضہ مغربی کنارے میں فائرنگ کر 26 سالہ فلسطینی نوجوان کو شہیدکردیا۔

فلسطینی وزارت صحت کے مطابق26 سالہ فلسطینی کو رملہ پناہ گزین کیمپ میں شہید کیا گیا ہے۔واضح رہے کہ اسرائیلی فوج وقتا فوقتا مغربی کنارے کے اندر دھاوے بول کر کارروائی کرتی رہتی ہے، اس کے نتیجے میں فلسطینیوں کے ساتھ جھڑپیں ہو جاتی ہیں۔نابلس میں اسرائیلی پولیس کے دھاووں اور قبضے کی کارروائیوں کے خلاف فلسطینیوں کے مظاہرے معمول بن چکے ،جب کہ اسرائیلی پولیس ان پر آنسو گیس کی شیلنگ کے علاوہ براہ گولیاں بھی برساتی رہتی ہے۔

گزشتہ ہفتے مقبوضہ مغربی کنارے میں اسرائیلی فوج کی اندھادھند فائرنگ سے ایک فلسطینی 31 سالہ جمیل کیال جاں بحق ہوگیا تھا، انٹرنیٹ پر زیر گردش وڈیو کلپ میں فلسطینی شہری جمیل کیال کو زمین پر پڑا ہوا دیکھا گیا، اس کے سر سے خون بھی بہہ رہا تھا۔خیال رہے کہ مغربی کنارے میں کشیدگی معمول کی بات ہے جہاں اسرائیل کی جانب سے فلسطینی سرحد میں 1967 میں قبضے کے بعد شہریوں پر حملے جاری ہیں۔

رواں ماہ کے اوائل میں جینن مہاجر کیمپ میں اسرائیلی سیکیورٹی فورسز کے ساتھ جھڑپ میں 4 فلسطینی جاں بحق ہوئے تھے۔مغربی کنارے میں تقریباً 28 لاکھ فلسطینی مقیم ہیں جبکہ 4 لاکھ 75 ہزار اسرائیلیوں کی آباد کاری ہوئی ہے جو بین الاقوامی قوانین کے مطابق غیرقانونی ہے۔