سلامتی کونسل میں جنگ بندی کی قرارداد ویٹو کئے جانے پر سعودی وزیر خارجہ کا ردعمل آگیا۔
سعودی وزیر خارجہ فیصل بن فرحان کا کہنا ہے کہ افسوس کی بات ہے جنگ بندی کو شرمناک لفظ سمجھا جانے لگا ہے، مجھے یہ بات ہرگز سمجھ نہیں آئی۔
سعودی وزیر خارجہ نے مزید کہا کہ کشیدگی کو ختم کرنے کے لئے سارے ممالک کوشش کرتے ہیں، کشیدگی ختم کرنے میں سلامتی کونسل کی ناکامی پر افسوس ہے۔
فیصل بن فرحان نے کہا کہ امریکا کی جانب سے جنگ بندی کی قرارداد ویٹو کرنے کی مخالفت کرتے ہیں۔
امریکا کی جانب اقوام متحدہ سلامتی کونسل میں جنگ بندی کی قرارداد ویٹو کیے جانے کی ایران اور ترکیہ نے بھی مذمت کی ہے۔
ایرانی وزیر خارجہ نے اپنے بیان میں کہا کہ جنگ کی امریکی حمایت جاری رہی تو خطے میں بے قابو صورتحال کا امکان ہے۔
ترکیہ کے صدر رجب طیب اردوان کا کہنا تھا کہ غزہ جنگ بندی کی قرارداد صرف امریکا نے ویٹو کی، کیا یہ انصاف ہے؟
ترک صدر نے مزید کہا کہ اقوام متحدہ سلامتی کونسل میں اصلاحات کی ضرورت ہے۔
