وزیراعظم عمران خان نے کہا ہےکہ صحت کارڈز بہترین اقدام ہے، کسی حکومت نے اتنے انقلابی فیصلے نہیں کیے،یہ وقت بتائے گا میٹرو ٹرین ملک کو زیادہ فائدہ پہنچائے گی یا صحت کارڈ۔
وزیراعظم عمران خان نے گورنر ہاؤس لاہور میں خصوصی تقریب کے دوران صحت کارڈز کی باقاعدہ تقسیم کا آغاز کردیا ہے۔تقریب سے خطاب کرتے ہوئے انہوں نے کہاکہ وقت بتائےگا میٹروٹرین زیادہ فائدہ پہنچائے گا یاصحت کارڈ۔
وزیراعظم عمران خان نے لاہور میں نیا پاکستان قومی صحت کارڈ تقسیم کر کے لاہور ڈویژن کے لیے یونیورسل ہیلتھ کوریج کا آغاز کر دیا، جس کے تحت ہر گھرانے کو سالانہ 10 لاکھ روپے تک کے مفت علاج کی سہولت مہیا ہو گی۔ سہولت کا دائرہ کار مارچ تک پورے پنجاب تک وسیع کر دیا جائے گا۔ pic.twitter.com/4ZY7Fsp5Tg
— Prime Minister’s Office, Pakistan (@PakPMO) December 31, 2021
فلاحی ریاست
وزیراعظم عمران خان کا کہنا تھا کہ فلاحی ریاست میں ہر آدمی کی بنیادی ضرورت پوری ہوتی ہے، اس کی ایک کڑی صحت کارڈ بہترین اقدام ہے، پنجاب کے ہر خاندان کو صحت کارڈ میسر ہوگا، جس کے ذریعے ہر شہری 10 لاکھ روپے تک علاج کروا سکتا ہے۔ زیراعظم کا کہنا تھا کہ ہم فلاحی ریاست کی بنیاد بنانے کیلیےمصروف عمل ہیں، بدقسمتی سے فلاحی ریاست کا ماڈل مسلم دنیا میں نظر نہیں آئے گا، یورپی ممالک میں فلاحی ریاست نظر آئے گی، مسلم دنیا اس سے محروم ہے، بیرون ملک پاکستانیوں سے پوچھیں فلاحی ریاست کیا ہوتی ہے، تقاریر میں ہم نے اسلام کے بڑے نعرے لگائے لیکن عملی طور پر کچھ نہیں کیا، رسول اکرمﷺنے جس فلاحی ریاست کی بنیاد رکھی وہ بہترین ماڈل ہے، ہمارے نبی ﷺ رحمت المسلمین نہیں بلکہ رحمت للعالمینؐ تھے، ایشین ٹائیگر مدینہ کی فلاحی ریاست کےسامنے کچھ نہیں، قوم رسول اکرمﷺکے بتائے اصولوں کو اپنائے۔
کیا ایشین ٹائیگر ریاست مدینہ کا مقابلہ کر سکتا ہے؟
وزیراعظم نے کہا کہ ماضی کےحکمران کہتے تھے پاکستان کو ایشین ٹائیگر بنائیں گے، کیا ایشین ٹائیگر ریاست مدینہ کا مقابلہ کر سکتا ہے۔ ہمارے بزرگوں نے فیصلہ کیا تھا پاکستان فلاحی ریاست ہوگی۔ پاکستان میں وسائل اورخوشحالی مغرب میں زیادہ ہے لیکن بدانتظامی نے صورتحال بگاڑ دی۔
انہوں نے کہا کہ پاکستان میں خاموش انقلاب آرہا ہے، کم آمدن والےافرادکوگھر بنانے کیلئے قرض دینے کا آغاز ہو چکا ہے، 20لاکھ خاندانوں کو بلا سود قرضے فراہم کئےگئے ہیں۔ ملک میں نجی شعبہ اب خودہسپتال بنائےگا جس سے پورےپ اکستان میں ہسپتالوں کاجال بچھ جائےگا۔
بعد ازاں وزیراعظم سے وزیراعلیٰ پنجاب سردار عثمان بزدار نے ملاقات کی جس کے دوران صوبے کے امور سے متعلق وزیراعظم کو بریفنگ دی اور بلدیاتی انتخابات کی تیاریوں اور جاری ترقیاتی منصوبوں سے آگاہ کیا۔ انہوں نے تعلیم، صحت اور امن وامان کیلئے پنجاب حکومت کے اقدامات سے بھی آگاہ کیا۔ وزیراعظم نے پنجاب حکومت کے اقدامات پر اطمینان کا اظہار کیا اور عوامی اقدامات کے کاموں میں مزید تیزی لانےکی ہدایت کی۔
