کیپٹل ہل پر حملے کو ایک سال مکمل ہونے پر امریکی صدر جو بائیڈن نے قوم سے خطاب میں کہا ہے کہ کیپٹل ہل پر حملہ کرنے اور اس واقعے کو ہوا دینے والے ٹرمپ کے حامیوں نے امریکہ اور اس کی جمہوریت کے گلے میں خنجر گھونپا۔ انہوں نے کہا کہ ایک سال قبل امریکی صدارتی انتخابات ہارنے والے صدر نے اقتدار کی پرامن منتقلی روکنے کی کوشش کی۔ مشتعل ہجوم نے کیپٹل ہل پر حملہ کیا، گھنٹوں اس پر قبضہ کئے رکھا لیکن ٹرمپ خاموش رہے اور کوئی ایکشن نہ لیا۔ امریکی صدر کا کہنا تھا کہ ٹرمپ کے حامی مظاہرین آئین کو توڑنا چاہتے تھے، ٹرمپ نے جھوٹ کا جال بنا، ان کی انا جمہوریت اور آئین سے زیادہ اہمیت رکھتی تھی، وہ انتخابی نتائج اور امریکی عوام کی مرضی قبول کرنے سے انکار کرنے والے پہلے امریکی صدر تھے، لیکن وہ سب ناکام ہوئے۔ جوبائیڈن نے کہا کہ ہمیں اس دن کو ایسے منانا ہو گا کہ آئندہ کوئی اس عمارت پر حملہ کرنے کی جرات نہ کرے، میں آئندہ کسی کو جمہوریت پر حملے کی اجازت نہیں دوں گا۔

کیپٹل ہل پر حملے میں مرنے والوں کی یاد میں ایوان نمائندگان میں ایک منٹ کی خاموشی بھی اختیار کی گئی۔

یاد رہے کہ سابق امریکی صدر ڈونلڈ ٹرمپ کے صدارت کے آخری ایام میں ان کے حامیوں نے امریکی پارلیمنٹ کی عمارت پر حملہ کر دیا تھا، جس کی انہوں نے حمایت کی تھی