وفاقی وزیر اطلاعات فواد چوہدری نے سانحہ مری پر تنقید کرتے اپوزیشن لیڈر شہباز شریف کو آڑے ہاتھوں لیتے ہوئی کہا ہے کہ شہباز شریف شعبدہ باز ہیں، 30 سال حکومت کرنے کے باوجود بھی یہ لیڈر نہیں بن سکے۔
اسلام آباد – (اے پی پی): آج قومی اسمبلی میں خطاب کرتے ہوئے وفاقی وزیر اطلاعات و نشریات فواد چوہدری نے کہا ہے کہ شہباز شریف عادی شعبدہ باز ہیں، انہیں حادثات پر سیاست یا شعبدہ بازی کے سوا کچھ نہیں آتا، تیس تیس سال حکومت کر کے بھی یہ لیڈر نہیں بن سکے، آج کا پیبلو ایسکوبار ہمیں بتا رہا ہے کہ نیرو سو رہا تھا، انہوں نے پنجاب اور مری میں وسائل خرچ کئے ہوتے تو آج ہمیں یہ دن نہ دیکھنا پڑتا، شریف فیملی نے صرف اپنے محلات کھڑے کئے، ان کے دور میں ہونے والی ترقی ان کے گھروں تک محدود تھی، تحریک انصاف کے سوا مری ریسکیو آپریشن میں کوئی دوسری جماعت موجود نہیں تھی، اپوزیشن کی دونوں بڑی جماعتوں نے تیس سال میں بونے پالے جو بڑے نہیں ہو سکے۔
30 سال حکومت کرنے والے اور آج کے دور کا پابلواسکوبار بتا رہا ہے کہ نیرو سو رہا ہے ۔ مری میں اگر انہوں نے وسائل خرچ کیئے ہوتے تو یہ دن نہ دیکھنا پڑتا۔
یہ وزیراعظم عمران خان ہیں جنہوں نے بتایا کہ ماحولیات کیا ہے اور اسکا تحفظ کیا ہے۔ @fawadchaudhry pic.twitter.com/N6RT2uW1Ro— PTI (@PTIofficial) January 10, 2022
فواد چوہدری کا کہنا تھا کہ مری سانحہ پر ہر آنکھ اشک بار ہے، مری میں 64 ہزار گاڑیاں پانچ دن میں داخل ہوئیں۔ ہمیں فخر ہے کہ وزیراعلیٰ پنجاب، وفاقی وزرائے، پاکستان تحریک انصاف کے ایم این ایز اور ایم پی ایز سمیت ہمارے ورکرز مری میں عوام کے ساتھ کھڑے تھے۔ سول انتظامیہ، پاک فوج اور سول اداروں نے مری میں ریسکیو آپریشن کر کے لاکھوں لوگوں کو نکالا۔ انہوں نے کہا کہ سابق وزیراعظم شاہد خاقان عباسی اور ن لیگ کا کوئی بندہ مری میں نظر نہیں آیا، انہوں نے وہاں جانے کی زحمت بھی گوارا نہیں کی۔ انہوں نے کہا کہ چوبیس گھنٹوں کے اندر ریسکیو آپریشن کر کے تمام سڑکیں کلیئر کر دی گئیں۔
مری کے سانحہ پر ہر آنکھ اشک بار ہے، گزشتہ دنوں ریکارڈ برفباری ہوئی اور ایک لاکھ چونسٹھ ہزار گاڑی مری گئی لیکن صرف چوبیس گھنٹوں میں روڈ کلیئر کی گئی اور ہمارے منتخب نمائندے وہاں موجودد رہے، وزیراعلیٰ وہاں پہنچے اور ریسکیو آپریشن کی نگرانی کی۔ وزیر اطلاعات @fawadchaudhry pic.twitter.com/BjcvFjFbkm
— PTI (@PTIofficial) January 10, 2022
فواد چوہدری نے کہا کہ شہباز شریف جب وزیراعلیٰ تھے تو ہر روز نیا واقعہ رونما ہوتا تھا، ان کے دور میں ہسپتال میں آکسیجن نہ ہونے کی وجہ سے 100 بچے ہلاک ہو گئے تھے اور یہ منہ دیکھ رہے تھے۔ انہوں نے کہا کہ ماڈل ٹاؤن کا واقعہ رونما ہوا، معصوم لوگوں پر گولیاں برسائی جا رہی تھیں اور شہباز شریف کا کہنا تھا کہ انہیں روکنا میرا کام نہیں۔
وفاقی وزیر اطلاعات نے کہا کہ شریف فیملی نے صرف اپنے محلات کھڑے کئے، ان کے دور میں ہونے والی ترقی ان کے گھروں تک محدود تھی۔ انہوں نے کہا کہ پاکستان تحریک انصاف کی حکومت نے تین سالوں میں 13 نئے ریزارٹس بنائے، وزیراعظم عمران خان نے بلین ٹری سونامی پروگرام کا آغاز کیا، ملک میں سیاحت کو فروغ دیا۔ انہوں نے کہا کہ آج پاکستان میں سیاحت کے شعبہ میں انقلاب برپا ہو چکا ہے اور یہ ہمیں سبق دے رہے ہیں کہ ہمیں کیا کرنا چاہئے تھا۔
اپوزیشن آئندہ سات سال روتی رہے گی
فواد چوہدری نے کہا کہ ملک میں اندرونی سیاحت کی ایک نئی حقیقت نے جنم لیا ہے، آج الحمد للہ لاکھوں لوگ اندرون ملک سیاحت سے مستفید ہو رہے ہیں۔ انہوں نے کہا کہ ہمیں ایسے انتظامی اسٹرکچر کی ضرورت ہے جو بڑی آبادی کی ضروریات کو پورا کر سکے۔ان کا کہنا تھا کہ ہم نے نیا پاکستان کا وعدہ کیا ہے، وزیراعظم عمران خان کی قیادت میں ہم نیا پاکستان بنا کر رہیں گے،معیشت، انتظامی، سیاحت سمیت ہر شعبے میں ان لوگوں کے بوئے ہوئے کانٹے ہم صاف کر رہے ہیں، اپوزیشن آئندہ سات سال بھی روتی رہے گی، ان کا کام رونا ہے۔ ان شاءاللہ عمران خان کی قیادت میں پاکستان ترقی کی منازل طے کرے گا۔
