عرب فوجی اتحاد نے یمن کے مختلف صوبوں میں بڑی کاروائیاں کی ہیں، جن میں ایران کی حمایت یافتہ ملیشیاء کے 340 سے زائد جنگجوؤں کو ہلاک کرنے کا دعویٰ کیا گیا ہے۔

ترجمان عرب اتحاد کے مطابق یمنی صوبے مآرب میں حوثی ملیشیا کے خلاف گذشتہ 24 گھنٹوں میں 33 فوجی کارروائیاں کی گئی ہیں، جن میں ایران کی حمایت یافتہ ملیشیاء کے 190 سے زیادہ ارکان ہلاک، جبکہ ان کی 21 فوجی گاڑیاں تباہ کر دی گئی ہیں۔ سعودی میڈیا کے مطابق عرب فوجی اتحاد نے یمن کے صوبے البیضاء میں بھی 27 اہدافی فضائی کارروائیاں کیں، جن میں ایران کے حمایت یافتہ 150 حوثی جنگجوؤں کوہلاک اوران کی 16 فوجی گاڑیوں کو تباہ کر دیا گیا ہے۔

یاد رہے کہ عرب فوجی اتحاد نے یمن میں حوثی باغیوں کے خلاف کاروائیاں تیز کر دی ہیں، اور شہریوں کو خبردار کیا ہے کہ وہ پہلے سے نشانہ بنائے گئے مقامات کے قریب نہ جائیں اور نہ ہی کسی جگہ غیر ضروری طور پر اکٹھے ہوں۔