ٹوئٹر انتظامیہ نے سابق امریکی قتل کی فرضی اینی میٹڈ ویڈیو شیئر کرنے پر ایران کے سپریم لیڈر خامنہ ای کا ٹوئٹر اکاؤنٹ معطل کر دیا ہے۔

یاد رہے کہ ایران کے سپریم لیڈر آیت اللہ خامنہ ای نے دو سال قبل بھی ایرانی قدس فورس کے کمانڈر قاسم سلیمانی کے قتل کے پس منظر میں سابق امریکی صدر کے قتل کی فرضی ویڈیو کا ایک کلپ شائع کیا تھا، جس کی وجہ سے خامنہ ای کی ویب سائٹ khamenei_site کا ٹوئٹر اکاؤنٹ گزشتہ سال بند کر دیا گیا تھا۔

میڈیا رپورٹس کے مطابق آیت اللہ خامنہ ای کے ٹوئٹر اکاؤنٹ سے وہی ویڈیو دوبارہ پوسٹ کی گئی تھی، جس کے باعث ان کا سرکاری ٹوئٹر اکاؤنٹ بھی معطل کر دیا گیا ہے۔

ٹوئٹر کے ترجمان نے خبر رساں ایجنسی اے ایف پی کو بتایا ہے کہ ایرانی سپریم لیڈر سے وابستہ اکاؤنٹ @KhameneiSite کو ٹوئٹر پالیسی کی خلاف ورزی پر بند کیا  گیا ہے، جس پر سابق امریکی صدر ڈونلڈ ٹرمپ کے قتل پر مبنی اینی میٹڈ ویڈیو پوسٹ کی گئی تھی۔