کورونا کے مثبت کیسز کی شرح میں مسلسل اضافے کے پیش نظر ملک بھر کے سکولز بند کرنے کی خبروں پر نیشنل کمانڈ اینڈ آپریشن سینٹر کا واضح موقف سامنے آ گیا ہے۔
سوشل میڈیا پر زیر گردش این سی او سی کے جعلی ٹوئٹر اکاؤنٹ سے ٹوئٹ کی گئی تھی کہ این سی او سی کی میٹنگ میں یہ فیصلہ کیا گیا ہے کہ پاکستان میں تمام پرائمری اسکول تاحکم ثانی بند رہیں گے، مزید فیصلوں کا جلد اعلان کیا جائے گا۔
اس فیک نیوز پر طلباء اور ان کے والدین میں تشویش کی لہر دوڑ گئی، اور ہر کسی نے اس خبر کی تصدیق کیلئے سکولوں کی انتظامیہ سے رابطے کرنا شروع کر دئیے، لیکن ان افواہوں میں اضافے کے بعد این سی او سی کت آفیشل ٹوئٹر اکاؤنٹ سے ٹوئٹ کی گئی، جس میں جعلی خبر کی تصویر لگا کر اسے فیک قرار دیا گیا، مزید کہا گیا کہ اس ٹوئٹر اکاؤنٹ کے خلاف کاروائی کیلئے ایف آئی اے کے سائبر ونگ سے رجوع کر لیا گیا ہے۔
A fake news regarding closure of primary schools is circulating via fake twitter account. Action against this account has been initiated through FIA cyber crime wing. pic.twitter.com/qp7tL2PZe8
— NCOC (@OfficialNcoc) January 18, 2022
یاد رہے کہ ملک بھر میں کورونا کے مثبت کیسز کی شرح میں مسلسل اضافہ ہو رہا ہے، گذشتہ 24 گھنٹوں کے اعدادوشمار کے مطابق کورونا کے مثبت کیسز کی شرح 9.45 فیصد تک پہنچ گئی ہے۔
گذشتہ روز پنجاب کے وزیر تعلیم مراد راس کا کہنا تھا کہ کورونا کے باعث طلباء کا بہت زیادہ تعلیمی نقصان ہو چکا ہے، اب سکول بند نہیں کئے جائیں گے، جب تک دیگر محکموں کے دفاتر کھلے ہیں، تعلیمی ادارے کھلے رہیں گے۔
